Традиционалната кујна изобилува со убави вкусови, па да направиме нешто примамливо деновиве! За појадок направете си зелник со компири и праз, кој е по предлог на Катерина и знаеме дека е добар. Фотографијата кажува доволно, нели?!
Може да ве интересира: Домашен зелник со тиква.
Состојки:
За тесто:
- 700 гр брашно
- 1/8 свеж квасец
- 1/2 филџан (од 120 мл) масло
- 1 лажичка сол
- 1/2 лажичка шеќер
- околу 300-350 мл топла вода
За фил:
- 1 страк праз
- 2 компири со средна големина
- 1 сува пиперка
- сол, масло и вода по потреба.
Подготовка:
- Од состојките за тесто замесете средно меко нелепливо тесто.
- Поделете го тестото на 9 топчиња. Притоа, 8 топчиња треба да бидат со приближнобеднаква големина, а едното топче треба да е малку поголемо. Потоа, топчињата од тесто оставете ги да отстојат околу 20 минути.
- Во меѓувреме празот исечкајте го на поситно, а компирите изрендајте ги и ставете ги во тава со малку масло.
- Додајте ја и сувата пиперка исечена на парчиња.
- Откако ќе се запржат налејте малку вода, посолете и оставете да се пржи додека празот омекне.
- Откако ќе отстојат топчињата тесто, најпрво расукајте тенка кора од поголемото топче тесто.
- Расуканата кора ставете ја во плех премачкан со масло. Краевите на кората нека бидат надвор од плехот.
- Потоа, расукајте ги во тенки кори и другите топчиња.
- Секоја кора попрскајте ја со масло и нанесете од филот од праз, компири и сува пиперка.
- Малку наберете ја како на сликата и нанесете ја во плехот врз големата кора.
- Секоја наредна кора спремајте ја на ист начин и кружно редете ја во плехот.
- На крај, преклопете ги корите во плехот со краевите од големата кора, попрскајте го зелникот со масло и печете на 200 степени, или додека убаво порумени.
- Испечениот зелник попрскајте го со вода и вратете во рерна уште некој минутка да се впие водата. На здравје!
Рецептот го испратил: Катерина Милошевска Глигороска.
Ви препорачуваме да прочитате: Зелник со праз и тиквички.