Палентата има историја која датира од 1700 година кога ја стекнала својата популарност во Италија, каде што ја сметале за храна на селаните, бидејќи ја имало во изобилство и по ниска цена. Малата содржина на масти, прости шеќери и натриум, ја прават палентата добра основа за здрав оброк кој го обезбедува организамот со енергија.
Палентата која е позната и како пченкарен гриз, претставува оброк кој е многу лесен за приготвување и погоден за појадок, ручек или вечера, може да се сервира топла или ладна, мека или тврда, а одлично се комбинира со сирење, зеленчук, зачини како црн пипер, ким, босилек и слично.
Тајната за подготовка на совршена мека палента, погледнете ја на видеото и следете ги инструкциите:
Состојки:
- 4 чаши вода или пилешки бујон
- 1 чаша палента
- 1 мала лажичка сол
- 2 лажици путер
- ½ чаша рендан пармезан (во замена може да користите бело сирење или кашкавал).
Подготовка:
- Во тенџере на оган на висока температура ставете 4 чаши вода да се варат. Во тенџерето додајте ја солта и измешајте.
- Штом водата ќе зоврие, во тенџерето постепено додавајте ја палентата и постојано мешајте со помош на жица за матење. Потоа намалете ја температурата и мешајте додека палентата се згусти.
- Тенџерето покријте го со капак и оставете палентата да се вари 30 минути на ниска температура. На секои 5 до 7 минути кратко промешајте ја палентата со помош на дрвена лажица.
- На крај, исклучете го шпоретот, додајте го путерот и измешајте. Штом путерот ќе се растопи додајте го сирењето и измешајте. Потоа, поклопете го тенџерето и оставете ја палентата 5 минути. Измешајте, сервирајте ја палентата и послужете ја со месо, сос, сирење или парче путер.