Сигурно и вие при подготвување на десерти имате по некоја грешка во кујната, но тоа не треба да ве спречува повторно да се обидете да експериментирате со нови рецепти. И покрај секојдневната практика, и на најискусните слаткари им се случило да погрешат во подготовката на пандишпанот, па тортата која ја направиле да не изгледа совршено како што посакувале. Прочитајте одговори на вашите прашања.
Тортите секогаш изгледаат привлечно, но доколку ги подготвувате сами, а немате доволно искуство, тогаш може вашата торта да не биде како што сте посакувале. Квалитетот на состојките кои ги користите, свежината на јајцата, температурата и времето печење на пандишпанот, се дел од факторите кои може да влијаат да добиете различен резултат при приготвувањето на десертот, и покрај тоа што ја правите тортата по истиот рецепт.
Убавите торти кои се припремат за специјални прилики, најчесто се прават со неколку слоеви од пандишпан и фил. Пандишпаните за торта најчесто се прават од јајца, шеќер, брашно, ореви, лешници, бадеми и др. Пред да ги матите јајцата, оставете ги на собна температура најмалку 2 часа. Садот во кој ги матите јајцата, мора да биде чист и сув. Доколку имате неколку капки на вода, или претходно сте го користеле за подготовка на фил и слично, можно е јајца да не се изматат добро и да не ја постигнат посакуваната цврстина.
При подготвувањето на смесата, во длабок сад ставете ги брашното и прашокот за печиво, добро измешајте ги, а потоа пресејте ги со сито. Измешаното брашно со печивото, додајте го во садот со јајцата и секогаш мешајте со лажица. Така ќе добиете смеса без грутчиња, а при печењето пандишпанот лесно ќе нарасне.
За да добиете пандишпани со еднаква дебелина, најдобро е секој да се подготвува и пече посебно. Некои практикуваат да приготват еден пандишпан, а потоа да го пресечат хоризонтално, на неколку ленти, но доколку немате искуство, ве советуваме да не го правите тоа. При сечењето, пандишпанот може лесно да се искрши и да не се добијат посакуваните ленти со еднаква дебелина.
Смесата за пандишпан ставете ја во калап кој може лесно да се отвора, а пред печење калапот намрсете го и посипете го со брашно. Уште подобро е да користите хартија за печење.
Пандишпаните мора да се печат постепено и на умерена температура. Затоа, секогаш печете ги во загреана рерна и потрудете се да не ја отворате рерната на секои 5 минути. Ако кората на пандишпанот веќе потемнела, а сметате дека внатрешноста не е доволно печена, тавата во која се печи пандишпанот, прекријте ја со алуминиумска фолија.