Пробајте го уникатниот специјалитет од мелено месо, кој нашата драга пријателка Невена го нарече медалјони од мелено месо. Многу се декоративни, а убавиот изглед мами да посакате да ги направите, да ги пробате и споделите со пријателите. Идеални за секакви прилики, свечености и фамилијарни поводи.
Состојки:
- 600 гр мелено месо
- 70 гр леб
- 1/2 главица ситно рендан кромид
- јајце
- 1 лажиче буковска пипер
- 2 лажици ситно сечкан магдонос
- 60 гр кашкавал, исечкан на мали коцки
- сол, бибер и мешан зачин по вкус
- на врв од лажиче сода бикарбона
- 8 ленти чадена сланина.
Подготовка:
- Лебот искинете го на мали парчиња, па натопете го со малку вода за да омекне.
- Во сад ставете ги месото, кромидот, јајцето, содата и зачините.
- Лебот истиснете го од водата и додајте го во месото.
- Убаво измесете за да се изедначи смесата, а потоа додајте го кашкавалот и повторно измесете ја.
- Покријте ја смесата и оставете ја во фрижидер најмалку 2 часа да се спојат вкусовите или ако може да ја направите пред една вечер.
- Смесата од месо поделете ја на 8 дела и од секој дел направете малку повисоки ќофтиња, од прилика околу 1,5 см.
- Околу нив ставете по една лента сланина како обрач.
- Наредете ги во плех со хартија за печење и одозгора попрскајте ги со малку масло.
- Печете ги во загреана рерна на 180 степени околу 40-45 минути, за да добијат црвенкаста боја.
Медалјоните од мелено месо, послужете ги топли со прилог по желба и салата, а ние ви предлагаме да ги сервирате со печени компири со путер и рузмарин. На здравје!
Рецептот го испратил: Невена Ѓероска.