амино киселини

Што се есенцијални аминокиселини, која е нивната улога и која храна е богата со нив?

Аминокиселините се органски соединија кои учествуваат во градбата на протеините. Здравиот организам може сам да синтетизира 10 протеински аминокиселини. Овие аминокиселини се нарекуваат не есенцијални. Есенцијалните аминокиселини организмот не може сам да ги произведе, па мора да се внесуваат преку храната.

Во текстот кој следува ќе ве запознаеме со најважните есенцијални аминокиселини, која е нивната улога и во која храна се наоѓаат.

Леуцин

Леуцинот го поттикнува растот и зголемувањето на мускулната маса. Нивото на шеќер во крвта се регулира правилно со помош на оваа аминокиселина. Храна која е богата со леуцин е: ориз, мешунки, банани, јаболка, боровинки, маслинки, суво грозје и семе од сусам.

аминокиселини

Изолеуцин

Оваа аминокиселина има слични својства како и леуцинот. Помага во производството на енергија во организмот и учествува во формирањето на хемоглобин и развојот на мускулите, особено кај децата. Изолуциниот се наоѓа во бадемите, гравот, леќата, овесот, зелката, киноата, семето од коноп, сончогледот и сусамот, брусниците, јаболката и кивијата.

Лизин

Регулацијата на метаболизмот на мастите и одржувањето на оптимално ниво на холестерол во крвта е под контрола на лизинот како есенцијална аминокиселина. Исто така, оваа аминокиселина помага за зајакнување на коските како резултат на добрата апсорпција на калциум. А корисна е при остеопороза, мачнина, депресија и замор. Гравот е најдобар извор на лизини, а покрај тоа го има во леќата, леблебиите, сојата, магдоносот, бадемите, алгата спирулина и авокадото.

Метионин

Метионинот е неопходен за изградбата на рскавицата. Луѓето кои не внесуваат доволно метионин имаат проблеми со зараснувањето на раните. Артритисот е заболување кое може да се јави како резултат на недостаток на метионин. Оваа есенцијална аминокиселина учествува во развојот на мускулите и го помогнува формирањето на креатин. Тој е неопходен за оптимално ниво на енергија во клетките. Метионинот најповеќе го има во сончогледот, семето од коноп, бразилските ореви, овесот, пченицата, алгите, мешунките, интегралниот ориз, кромидот и какаото.

Фенилаланин

Фенилаланинот е важен за подобрување на функцијата на мозокот и одржување на здравјето на штитната жлезда. Недостатокот на фенилаланин доведува до намален апетит, пад на енергијата, депресија, намалување на меморијата. Намирници кои се богати со фенилаланин се: бобинкасто овошје, интегрален ориз, авокадо, кикирики, бадеми, маслинки, грозје, смокви и лиснат зеленчук.

Треонин

Имунолошкиот систем, работата на срцето и црниот дроб, централниот нервен систем, сврзното ткиво и зглобовите, функционираат успешно со помош на есенцијалната аминокиселина треонин. Оваа аминокиселина е неопходна за здрава кожа, коски, коса и нокти. Покрај тоа го спречува таложењето на масти во црниот дроб. Најдобри растителни извори се спирулина и поточарка. Се наоѓа и во зелениот лиснат зеленчук, тиквата, сончогледот, пченицата, сувото грозје, сусамот и смоквите.

Триптофан

Триптофанот е аминокиселина одговорна за релаксација и е од клучно значење за здравјето на нервниот систем, функционирањето на неуротрансимитерите и добриот сон. Оваа киселина е одговорна за производство на серотонин (хормон на среќата). Јадете што повеќе овес, банани, јаболка, портокали, сладок компир, магдонос, грав, целер, смокви, печурки, пиперки, моркови и кромид за да се чувствувате по релаксирано.

Валин

Има важна улога за развој, регенерација и издржливост на мускулите. Валинот се наоѓа во гравот, спанаќот, брокулите, сусамот, боровинките, рибизлите, портокалите и кајсиите.

Хистидин

Учествува во транспортот на неутротрансмитерите во мозокот и го одржува здравјето на мускулните клетки. Ја поттикнува детоксикацијата на телото, помага во производството на црвени и бели крвни клетки, а го зајакнува и имунитетот. Недостатокот на хистидин придонесува за појава на артритис. Добри растителни извори се интегрален ориз, пченица, рж, хељда, мешунки, алги, диња, компири, зелка и пченка.

Ви предлагаме да прочитате: 5 симптоми кои укажуваат на недостаток на протеини.

Сподели: