Пријатели, си набавивме блендер и си повикавме друштво. Сакавме да ги послужиме со нешто здраво, па решивме да ги направиме нашите омилени рецепти за смути. Детокс, витаминско и имуно смути беа нашиот избор.
Сите беа изненадени од прекрасниот вкус, а кога им кажавме дека тајната е во изборот на состојки, веднаш сакаат да ги пробаат сите вкусови. Инспирирани сме секој ден да приготвуваме здрави смути, но и свежи овошни сокови за целото семејство.
Па, еве ги рецептите:
Детокс смути
Зелена комбинација за совршено здравје и детоксикација! Здравиот спанаќ во комбинација со ѓумбир, јаболко и киви, преточени во вкусно смути. Од наведените состојки ќе добиете 3 чаши со детокс смути.
Состојки:
- 1 зелено јаболко
- 2 киви
- 200 грама спанаќ
- 1 чаша кокосово млеко
- 1 ½ чаша вода
- 2 лажички свеж ѓумбир.
Подготовка:
- Спанаќот добро измијте го.
- Ѓумбирот излупете го и изрендајте го. По желба може и да го исечкате.
- Јаболкото измијте го и исечете го на парчиња.
- Кивите излупете ги и исечкајте ги на парчиња.
- Во блендер ставете ги кокосовото млеко, водата, ѓумбирот, спанаќот, сечканото јаболко и кивијата. Блендирајте околу 15 секунди. Потоа со помош на шпатулата притиснете го спанаќот. Продолжете со блендирање со опцијата за смути околу 30 секунди. Готовото смути ставете го во чаши и послужете го. На здравје!
Имуно смути со калинка и вишни
Ова имуно смути ќе ви даде енергија, а вкусот и аромата се фантастични! Вишни, калинки и цимет е добитната комбинација. Ако го применувате почесто, ќе ви помогне во одржувањето на здравиот имунитет, а во зима тоа е она што ни е потребно најмногу.
Состојки:
- 1 чаша замрзнати вишни без семки
- ¾ чаша свежо цеден сок од калинка (1 ½ калинка)
- ½ чаша јогурт
- 1 лажица свежо цеден сок од лимон
- 1 лажица мед
- цимет по вкус
- 2 коцки мраз.
Подготовка:
- Калинките измијте ги и пресечете ги на половина. Исцедете ги со помош на цедилка за да добиете сок.
- Во бледнерот ставете ги свежо цедениот сок од калинка, јогуртот, сокот од лимон, замрзнатите вишни, мразот и додајте цимет по вкус.
- Блендирајте со опцијата на смути за време од 30 секунди до 1 минута. Готовото смути ставете го во чаша и послужете го. На здравје!
Витаминско смуди со портокали и банани
Започнете го денот со витаминско смути! Направено со портокали и банани, идеално за сечиј вкус. Од наведените состојки ќе добиете две чаши вкусно смути со тропски вкус.
Состојки:
- 2 портокали
- 1 банана
- ½ чаша свежо цеден сок од портокал или мандарина
- 2 лажици јогурт
- 1 чаша вода или растително млеко (бадемово, кокосово или оризово)
- 1 лажица мед, стевиа или друг засладувач по желба
- 3-4 коцки мраз по желба.
Подготовка:
- Земете еден портокал и исцедете го со цедалка.
- Потоа, отстранете ја кората на двата портокали и исечкајте ги.
- Бананата излупете ја и исечкајте ја.
- Во блендерот ставете ги свежо цедениот сок од портокал, јогуртот и водата. Додајте ги сечканите портокали и банана. На крај, засладете со мед, стевија или друг засладувач по желба.
- Блендирајте со опцијата на смути за време од 30 секунди до 1 минута. Во две чаши ставете коцки мраз. Потоа ставете го витаминското смути и послужете. На здравје!
Грижата за сопственото здравје е наша должност, која сега е многу полесно да се исполни! А кој рецепт е вашиот избор?
Ви предлагаме да прочитате: Типови на храна кои ќе ти помогнат да се чувствуваш подобро.