Солен куглоф со зелје и семиња • Сè за храна

Обожаватели сме на храната од природата и многу често е на нашето мени во разни варијанти. Во оваа прилика ви предлагаме солен куглоф со зелје и семиња, со нежен вкус и прилагоден на сите генерации, а составот е без глутен што е одлична вест за многумина. Подготовката не може да биде поедноставна , без миксер, брза и лесна!

Може ли да биде подобро?!

Состојки:

За куглоф:

3 средно големи јајца
100 грама бело сирење (младо или фета)
250 мл јогурт
75 грама чистено зелје
2 лажици маслиново масло
3/4 чаша пченкарно брашно
1 ќесичка прашок за печиво
1/2 лажичка сол или прстофат сол по вкус
1 лажичка чиа семе
2 лажици лупен сончоглед
1 лажица семки од тиква.

За печење и декорација:

путер за премачкување на калапот по потреба
1 лажичка чиа семе
1 лажица сончоглед
1 лажица интегрален сусам
1 лажичка ленено семе
1 лажица семки од тиква.

Подготовка:

Најпрво измијте го зелјето. Со помош на нож, отстранете ги тврдите стебленца од листовите и потоа исечкајте го на поситно.
Во поголем сад ставете ги јајцата и изматете ги со помош на виљушка.
Сирењето издробете го и додајте го во садот со јајцата. Додајте ги и маслото и јогуртот, па измешајте. А потоа, додајте го и претходно исечканото зелје.
Во друг сад измешајте ги сувите состојки. Ставете го прво брашното, па печивото, солта, чиа семето, сончогледот и семките од тиква. Измешајте за да се распределат состојките.
Постепено и со постојано мешање додајте ги сувите состојки во садот со течните.
Додека го припремате калапот, рерната пуштете ја да се загрева на 200 степени.
Калапот за куглоф премачкајте го со путер по целата површина, а потоа распоредете ги семињата за декорација по неговата основа и на крај турете ја рамномерно смесата за печење.
Ставете го куглофот да се печи во загреаната рерна и намалете ја температурата на 180 степени. Печете околу 25 минути и оставете го куглофот 5 минути во исклучена рерна. Извадете го од рерната и покријте го со кујнска крпа. Исечете го на парчиња и на здравје!