Солен ролат со фил од туна 1

Солен ролат со фил од туна

Овој пат на блогот Слатки тајни, кај нашата пријателка Лидија наидовме на вкусен и декоративен солен ролат со фил од туна. Се прави брзо и лесно, а изгледа многу несекојдневно, па сигурни сме дека сите ќе бидат воодушевени од вашата оригиналност. Покрај тоа, овој ролат не содржи глутен, па безбеден е и за лицата кои страдаат од целијакија.

Ролатот е совршен за вашите семејни прослави, свадби и крштевки. А, сезоната на свадби е во полн ек, па доколку се одлучите сами да ја припремате трпезата за вашиот голем ден, еве една супер идеја. Ролатот покрај тоа што е превкусен е и многу декоративен.

Солен ролат со фил од туна 2

Состојки:

За тесто:

  • 450 г замрзнат спанаќ
  • 4 јајца
  • сол и црн пипер по вкус

За фил:

  • 2-3 конзерви со парчиња туна во вода
  • 1 главица црвен кромид
  • 1 чили/луто пиперче
  • 3-5 лажици кисела павлака
  • свеж копар по желба
  • сок од лимон
  • сол и црн пипер по вкус

Подготовка:

  1. Најпрво се прави кората за ролатот. Доколку користите замрзнат спанаќ, добро одмрзнете го и процедете го од водата.
  2. Потоа одделете ги белките од жолчките во посебни садови. Во садот со жолчки додајте го спанаќот и добро промешајте. Зачинете со сол и црн пипер по вкус.
  3. Белките изматете ги во цврста пена и додајте ги во садот со жолчките и спанаќот. Мешајте внимателно додека сите состојки се соединат.
  4. Плехот за печење обложете го со мрсна хартија и премачкајте го со путер или масло. Потоа, истурете ја смесата и добро измазнете ја со лажица низ целата површина на плехот. Печете во добро загреана рерна со вентилатор на 200 степени околу 15 минути.
  5. Откако кората ќе се испечи извадете ја од рерната и оставете ја да се излади. Штом се излади превртете ја врз друга мрсна хартија и обидете се нежно да ја отстраните хартијата за печење која се залепила врз кората.
  6. Потоа подгответе го филот за ролатот. Туната процедете ја од водата. Кромидот, лутото пиперче и копарот ситно исечкајте ги.
  7. Во подлабок сад промешајте ги туната и исечканите зеленчуци. Додајте ги и киселата павлака и сокот од лимон. Се добро промешајте и зачинете по вкус со сол и црн пипер.
  8. Со вака подготвениот фил премачкајте ја изладената кора за ролат.
  9. Потоа, почнете со виткање на ролатот од подолгата страна на кората.
  10. Готовиот ролат завиткајте го во мрсна хартија и ставете го во фрижидер за да се стегне околу 1 до 2 часа. На крај, пресечете го на парчиња и послужете го. На здравје!

Напоменa: Филот треба да биде посув, затоа сокот од лимон и павлаката треба да се додаваат постепено за да не се добие премногу течна конзистенција на филот.

Рецептот го испратил: Лидија Јошевска, slatkitajni.com.

Ви препорачуваме да прочитате: Солен ролат со крем сирење и шунка.

Сподели: