Ги обожаваме традиционалните рецепти, но секогаш сакаме да испробаме нешто ново и вкусно. Така, ги забележавме овие солени чаши кои веднаш ни привлекоа внимание. А штом ги прочитавме состојките, знаевме дека и вие ќе сакате да ги пробате. Затоа го споделуваме рецептот за солен чизкејк со сирење и песто од магдонос и спанаќ.
Оваа супер комбинација и креативен рецепт за солен чизкејк ни доаѓа на предлог на Диана, која рецептот го објави на нејзиниот блог Trydiani.
Состојки:
- 150 грама моцарела (по можност оригинална од биволско млеко)
- 150 грама крем сирење
- 1 до 2 лажици павлака или млеко
- 4-8 лажици кршени солени бисквити или соленки по избор
- пресно мелен црн пипер
- домати и рукола за декорација.
За песто сос:
- 2 чаши магдонос
- ½ чаша спанаќ
- ¼ чаша рукола
- ¼ чаша масло
- 1 лажица пармезан
- 1 до 2 супени лажици свежо цеден сок од лимон или по вкус
- лимонова трева и сол по вкус.
Подготовка:
- Прво се подготвуваат чашите за сервирање. На секоја од нив се ставаат кршени солени бисквити.
- Моцарелата се сечка на коцки. Потоа се става во тенџере на оган на умерена температура да се растопи со 1 лажица павлака. Постојано се меша додека моцарелата се растопи. Тенџерето со растопената моцарела се трга од огнот и се додава крем сирењето. Кратко се меша, а ако кремот е многу густ се додава уште павлака.
- Кремот од сирење се става во чашите врз основата од бисквити. Потоа, чашите се ставаат во ладилник.
- Магдоносот, спанаќот и руколата се ставаат во блендер. Се додаваат маслото, пармезанот, сокот од лимон, сол и лимонова трева по вкус. Се пасираат додека се добие хомогена смеса.
- Вака приготвеното песто се става во изладените чаши. Се декорира со домати, рукола, мелен црн пипер, а за постигнување на медитерански вкус може да се послужи со маслинки. На здравје!
Ви предлагаме да прочитате: Рецепт за песто сос – прилог за тестенини.