Веруваме дека и вие како Кате, ќе бидете воодушевени кога ќе го пробате ова вкусно нешто! Ѓозлеме е турски специјалитет кој сега можеме и ние да го направиме самите дома и тоа по одличен испробан рецепт!
Описот на драгата Кате беше толку позитивен и мотивирачки што со голема радост го споделуваме рецептот за негова подготовка. како што спомнавме, вели дека била воодушевена кога прв пат пробала ѓозлеме, а посебно и се допаднало бидејќи е толку едноставно, а превкусно. Филот кој прв пат го пробала бил со некои тревки внатре, кои не успеала баш најдобро да ги разграничи кои се и што се, но било вкусно. Како и да е, филот може да биде и по ваш избор на пример, сирење или месо.
Состојки:
За тесто:
- 250 гр брашно
- ¼ лажичка сол
- топла вода по потреба.
За фил:
- 4 лажици испасирано сирење
- ½ лажичка копар
- 1 помал страк праз (само зелениот дел)
- сол по потреба
- масло по потреба.
Подготовка:
- Од состојките за тесто замесете средно меко тесто.
- Поделете го на 4 топчиња и оставете ги да постојат околу 20-30 минути.
- Празот ситно исечкајте го и кратко пропржете го, а потоа измешајте го со испасираното сирење и копарот.
- Од секое топче расукајте тенка кора, па нанесете од филот и завиткајте во ролат.
- Ролатот повторно расукајте го во кора. Повторете ја постапката со другите 3 топчиња тесто.
- Пржете ги во нелеплива тава со малку масло. Послужете ги топли со ајран и уживајте ги потполно!
Рецептот го испратил: Катерина Милошевска Глигороска.
Ви предлагаме да прочитате: Домашни посни лепчиња без масло.