Овој текст е за младите тинејџери, но посветен на вас, нивните родители, роднини, пријатели. Можеби се прашувате зошто? – Затоа што само со заедничка соработка може да се постигне заштита на менталното здравје на вашите тинејџери. Во време на пандемија, нивната ментална благосостојба е изложена на висок ризик, а скоро да сме сигурни дека тие и не би се ангажирале претерано барајќи литература со насоки за помош. Имајќи го предвид тоа, ве повикуваме вас, кои сте најблиски со нив, да ги споделите информациите од овој текст.

Од ден на ден расте вознемиреноста поради корона вирусот. Многу луѓе повеќе ги плаши економската ситуација која настана во светот поради овој вирус отколку неговото влијание врз здравјето. Голем процент од светската популација останале без работа или се приморани да работат од дома и немаат физички контакт со роднини, пријатели, колеги… За полесно прилагодување на околностите, потребно е да се посветиме и да се потрудиме за одржување добро ментално здравје, кое е најпогодено во оваа ситуација.