Брза непечена чоколадна торта со бисквити за 5 минути • Сè за храна

„Ви се најавиле гости, а немате многу време и желба за спремање на торта? Потребни ви се само 5 минути за да го приготвите чоколадното изненадување. Еве еден лесен рецепт за брза непечена чоколадна торта со бисквити и крем банани кој го приготвив за вакви „специјални“ прилики.

Токму така го креирав овој рецепт. Ми се најавија гости за кои знам дека обожаваат чоколадна торта, а времето за подготовка ми беше многу мало. Во најблискиот маркет ги набавив намирниците и започнав со приготвување. Само за 5 минути ги искршив бисквитите, го растопив чоколадото и ја ставив тортата во замрзнувач за да се стегне. Крајниот резултат е вкусна, крцкава чоколадна торта, која им се допадна на сите.“ – вели Марија од нашиот тим.

Состојки:

200 грама бисквити
200 грама чоколадо за готвење
5 крем банани
1 лажица екстракт од ванила
100 мл млеко.

Подготовка:

Бисквитите искршете ги со раце или исечкајте ги.
Крем бананите исечкајте ги на мали коцки.
Во тенџере на оган на ниска температура ставете го млекото и додајте го чоколадото искршено на коцки. Мешајте со лажица за да се растопи чоколадото. Потоа, додајте го екстрактот од ванила и измешајте.
Штом чоколадото се растопи, тенџерето тргнете го од оган.
Во растопеното чоколадо додајте ги кршените бисквити и крем бананите. Измешајте убаво.
Во калап или пластичен правоаголен сад ставете најлонска фолија. Во калапот додајте ја смесата од бисквитите и чоколадото. Убаво израмнете со лажица. Врз тортата ставете најлонска фолија и со рацете добро притиснете. Калапот затворете го со капак и ставете го во замрзнувач.
Оставете ја тортата за време од 1 до 2 часа додека се стегне. Изладената непечена чоколадна торта исечете ја на парчиња и послужете ја. На здравје!