Уживавме и тоа како во светот на вкусовите! Си направивме многу симпатична торта и ја комбиниравме со горко црно кафе. Неизбежно беше да се фотографира и да се пренесе вкусното задоволство, па ве покануваме да ја пробате и вие во вашите домови. Инспирацијата ја најдовме во новите Фрути јафа кекси од праска и приготвивме фантастично добра, вкусна и брза торта! Овој десерт може да го направи секој, а нема да ви одземе ни еден час.
Да ви ја опишеме малку. Мека е, сочна и идеална за секоја пригода. За родендени, куќни слави, дружење со пријателите или едноставно, за засладување со семејството! Веруваме дека поголемиот дел од состојките ги имате во кујната и без проблем можете да се одлучите да го испробате и овој рецепт креиран во кујната на Сѐ за храна. Во продолжение, детално ја објаснуваме постапката чекор по чекор, како и состојките кои ги користевме, па не постои можност за грешка при подготовката. А штом ја направите, не заборавајте да ни испратите фотографија од вашата торта, ќе ја очекуваме. Еве што ви е потребно.
Состојки:
- 6 јајца
- 8 лажици шеќер
- 1 ќесичка ванилин шеќер од Витаминка
- 1 чаша брашно
- 1 ќесичка прашок за печиво од Витаминка
- 2 лажици какао од Витаминка.
За фил:
- 2 ќесички шлаг крем од ванила од Витаминка
- 300 мл ладно млеко
- 200 грама Луна млечен крем
- 125 грама Фрути јафа кекси од праска.
За декорација:
- 100 грама Синтагма какао крем за торти (чоколадо за готвење)
- 1 лажица Брилијант масло.
Подготовка:
- Во сад за матење ставате ги јајцата, шеќерот и ванилиниот шеќер. Изматете ги со миксер за време од 5-7 минути, додека шеќерот се растопи и се добие густа смеса.
- Во друг сад измешајте ги брашното, прашокот за печиво и какаото од Витаминка. Со помош на сито или поголема кујнска цедилка, просејте ја смесата од брашното во садот со матените јајца. Оваа постапка е важна за да се добие пандишпан без грутчиња од какао или брашно. Смесата измешајте ја со лажица.
- Во правоаголна тава (бр. 40) или во две кружни тави (бр. 24 – 26) ставете хартија за печење. Во тавата ставете ја смесата за пандишпанот. Израмнете ја со лажица и ставете ја тавата во загреана рерна на 200 степени. Пандишпанот печете го за време од 7-10 минути. Извадете го пандишпанот и проверете со чепкалка дали е добро испечен.
- Печениот пандишпан оставете го да се излади, а потоа превртете го од тавата. Отстранете ја хартијата за печење и исечете два кружни дела (доколку користевте една поголема правоаголна тава за печење).
- Во сад за матење ставете ги шлаг кремот од ванила и ладното млеко. Изматете ги со миксер за време од 3 до 5 минути. Потоа, кремот поделете го на два еднакви дела. Во едниот дел додајте 200 грама Луна млечен крем и продолжете со матењето околу една минута, додека филот се соедини. Другиот дел оставете го за филување на тортата од горната страна и странично.
- Фрути кексите исечете ги на половина или четвртинки.
- Во чинија за торта ставете го едниот пандишпан. Врз пандишпанот нанесете половина од филот со Луна крем. Наредете ги сечените Фрути од праска, а потоа ставете го преостанатиот фил со Луна крем. Ставете го и вториот пандишпан. На крај, тортата премачкајте ја со шлаг кремот од ванила.
- Тортата ставете ја во фрижидер за време од 2 до 3 часа.
- Чоколадото и маслото ставете ги во сад и растопете ги на ниска температура. Со растопеното чоколадо полејте ја торта. Декорацијата завршете ја со шлаг крем и сечкани Фрути. Уживајте во светот на вкусовите со Витаминка!
Совет плус: Најдобро е тортата да ја послужите по неколку часови, а подобро е преку ноќ да стои во фрижидер за да се спојат вкусовите.
Ви предлагаме да прочитате: Атлантис торта – слатка морска идила за сечиј вкус.
*Комерцијален рецепт.