Од кујната на Марија Кочовска - Пенасти манчмелоу коцки • Сè за храна

Вкусно, пенасто уживање дополнето со овошен сладок вкус! – Во слатката кујна Марија приготви манчмелоу коцки со крцкава бисквита, пенаст фил и мармалад од кајсии за совршен финиш!

Подготовката е едноставна и ќе ви одземе 15-тина минути, а состојките кои се потребни ги имате во кујната. Гарантираме дека ќе им се допадне на сите, а децата најмногу ќе се радуваат!

Состојки:

250 грама шеќер (може да користите и шеќер во прав)
2 ќесички ванилин шеќер
300 мл вода
20 грама – 2 ќесички желатин во прав
100 г бисквити
100 г мармалад од кајсија

За декорација:

20 г шлаг пена
50 мл ладно млеко
срциња од чоколадо
свежо нане.

Подготовка:

Во поголема чаша ставете го желатинот и додајте 100 мл ладна вода. Измешајте и оставете го желатинот да набабри.
Шеќерот и ванилиниот шеќер ставете ги во сад за матење и измешајте со лажица.
Бисквитите наредете ги во правоаголен калап.
Преостанатата вода (200 мл) ставете ја на оган да се вари. Пред да зоврие тргнете ја од огнот и додајте ја во садот со желатинот. Измешајте за да се растопи желатинот.
Во садот со шеќерот постепено додавајте од течноста со желатинот и матете со миксер околу 3-5 минути додека се добие густ шлаг.
Шлагот ставете го во калапот и оставате смесата да се излади.
Извадете ја смесата од калапот и со помош на остар нож исечете коцки.
Шлаг пената изматете ја со ладното млеко и ставете ја во готварски шприц. Во друг готварски шприц ставете го мармаладот од кајсии.
Готовите манчмелоу коцки декорирајте ги со мармалад од кајсии, шлаг пена, срциња од чоколадо и гранчиња свежо нане. На здравје!

Препорака од авторот:

Ти се допаднаа рецептите? Ако си во потрага и по други испробани рецепти и идеи, посети ги моите профили на социјалните мрежи и пронајди ја твојата инспирација. Разгледај и заследиме на: