Брзи пикник погачки - вкусни залчиња за целото семејство • Сè за храна

„Нема месење, нема употреба на миксер! Меки, ровки и превкусни! – Целта ми беше да се што похранливи, а со помалку брашно, затоа што посветата на рецептот е за син ми кој има нешто повеќе од година и е мојата непресушна инспирација. Димитар ги обожава вкусните залчиња на мама, па ви гарантирам дека ќе ви се допаднат и вам. Пробајте ги моите брзи пикник погачки кои се одлични за целото семејство, и секако испратете ми ваши фотографии и впечатоци како ви се допаднаа!“ – срдечно препорачува Катерина Шамбевска Спасеновска од нашиот тим.

Со насмевка Катерина додава: „Топло време и расположение! Долгите светли и сончеви денови се тука, а тоа е совршена можност за вкусни оброци во природа и за прошетки! А секако, тука е и можноста за уживање во удобностите на домот, балкончето или дворчето, терасата или најблиската ливада, а зошто да не и на домашната трпеза додека сончевите зраци го осветлуваат целиот дом! Секоја седенка е одлична со вкусна храна, па во прва прилика препорачувам да ги пробате. Рецептот за највкусните и брзи пикник погачки кои некогаш ќе ги јадете ви го споделувам тука и сега!“

Состојки:

400 г изварка
2 јајца
100 мл кисела павлака
4 лажици кисело млеко
1 лажиче Витанез
110 мл Брилијант масло
2 полни лажици сечкани маслинки
2 средно големи изрендани моркови
исечкани зелени перца од 4-5 млади лукчиња
1 лажиче сол
1/4 лажиче црн пипер од Витаминка
1/2 лажиче прованса зачин – за замена може оригано
2 лажички прашок за печиво од Витаминка
1/2 лажичка сода бикарбона од Витаминка
грахам брашно по потреба (отприлика 4-5 лажици).

Совети плус за состојките:

Наместо зелени перца од лук, може да додадете малку лук во прав и да ставите 2-3 ливчиња спанаќ или блитва.
По желба, може да ставите бело, наместо интегрално брашно.

Подготовка:

Во сад ставете ги јајцата и изматете со виљушка.
Додајте ја изварката, павлаката, киселото млеко, Брилијант маслото, Витанезот, исечканите маслинки, зелените перца од младите лукчиња и изренданите моркови. Убаво измешајте.
Во друг сад измешајте ги сите суви состојки.
Соединете ги двете смеси, па убаво измешајте за добро да се соедини смесата.
Во плех ставете хартија за печење и со помош на 2 лажици ставајте од смесата врз хартијата. Не мора специјално да се трудите во оформувањето на погачките, бидејќи при печењето самите ќе се оформат. За една погачка доволна ви е една полна супена лажица од смесата.
Печете ги во плех обложен со хартија за печење, во претходно загреана рерна на 250 степени, за време од 13-15 минути. Уживајте во светот на вкусовите!

Препорака од авторот:

😊 Ако го пробате рецептот, тагнете ме или испратете ми порака. 👇 Чест ми е кога ве инспирирам, па за многу повеќе испробани рецепти и убави фотографии следете ме на моите профили: