Понекогаш сите имаме потреба за промена од секојдневните вкуснови и сакаме да пробаме нешто ново. Рецептот за оваа крем чорба од ослич е лесен за правење и е баш добар за промена во менито. Пробајте ја и вие!
Како препорака во врска со рецептот, Невена ни кажа: „Секогаш кога правев чорба од риба најпрво ја варев рибата, ја чистев од коските и кожата и за да се згусти правев запршка на стандарден начин. Овој пат употребив филети од ослич и за нејзино згуснување додадов компир.“
Состојки:
- 400 гр филети од ослич
- 4 средно големи компири (500 гр)
- 1/2 главица кромид
- 3 чешниња лук
- 1-2 лажици ситно сечкан магдонос
- 5-6 лажици маслиново масло
- 2 л вода
- по вкус сол, бибер и мешан сув зачин
- 1/2 лажиче лук во прав.
Подготовка:
- Компирите се лупат и се сечат на плочки, а филетите риба на помали парченца.
- Кромидот и лукот ситно се сечкаат и се ставаат во тенџере со маслото малку да се запржат колку да пуштат мирис.
- Потоа се додаваат компирите и рибата.
- Се додава водата и зачините по вкус и се остава да вари додека омекнат, околу 15 минути.
- Кога компирот и рибата омекнале, тенџерето се трга на страна и се блендираат да се добие мазна смеса, односно чорба.
- Се додава магдоносот и лукот во прав и се враќа на оган да повари уште 4-5 минути.
- Чорбата се служи топла со сок од лимон. На здравје!
Рецептот го испратил: Невена Ѓероска.
Ви препорачуваме да прочитате: Сочни ќофтиња од ослич.