Ако имате есенски декоративни тикви на располагање, време е да се вклучите во овој креативен „направи сам“ проект. Наместо да собираат прашина или пак да ги фрлите, може да ги искористите мудро и да направите уникатни свеќници од тиква.
Постапката за изработка на декоративните свеќници е едноставна и истата е прикажана и на видеото. На вас останува само да ги следите инструкциите и да го разубавите својот дом со несекојдневен свеќник.
Како да направите декоративни свеќници од тиква?
Пред да започнете, проверете дали ги имате на располагање следните материјали:
- тикви
- лепило
- четка за лепило
- светкава прашина
- дупчалка или пак метална кружна форма за колачи
- свеќи.
Начин на изработка на декоративните свеќници од тиква:
- Добро измијте ја тиквата, а потоа пребришете ја.
- Со помош на дупчалка или пак кружна форма за сечење на колачи, направете отвор во форма на круг, во горниот дел на тиквата, каде што се наоѓа дршката.
- Кругот кој што ќе го издлабите треба да биде малку поголем од свеќата. Ако отворот е поголем или пак подлабок од свеќата, може да користите алуминиумска фолија. Едноставно соберете ја и прилагодете ја во зависност од големината на свеќата.
- Со помош на четката нанесете лепило врз тиквата. Потоа, ставете ја светкавата прашина. За да не се растури прашината низ вашиот дом, пред да започнете како подлога поставете стар весник.
- Вака декорираните тикви оставете ги да се исушат, а потоа во внатрешноста ставете свеќа. Уникатниот декоративен свеќник од тиква, поставете го на посакуваното место.
Ви предлагаме да прочитате: Направете новогодишен свеќник со стапчиња цимет.