Супер изглед, а и името карневалски колачи е исто такво. Баш се слатки и различни од сите останати. Нам ни се допаднаа и со задоволство го споделуваме предлогов на Невена!
Еве што ни кажа таа за нив: „Овие се дел од карневалските колачиња кои името го добиле по составот на тестото што е основен дел за правење јуфки – таљатељи.“ Интересни ни беа и препорачуваме да ги пробате и вие!
Состојки:
- 2 јајца
- 200 гр брашно
- 1 портокал
- 1 лимон
- 2 полни лажици шеќер или шеќер во прав
- по потреба масло за пржење на јувките
- по потреба шеќер во прав.
Подготовка:
- Од јајцата и брашното замесете изедначено тврдо тесто. При месењето убаво удирајте го од масата за тестото да стане што помазно.
- Завиткајте го во најлонска фолија и оставете го да стои 30 минути на собна температура.
- За тоа време лимонот и портокалот ставете ги да стојат во вода со сода бикарбона. Потоа измијте ги и избришете ги.
- Тестото поделете го на два дела.
- Од едниот дел со сукало развлечете многу тенка правоаголна кора (дебелината да и е околу 2 мм).
- Посипете ја со 1 лажица шеќер и изрендајте ја кората од портокал.
- Завиткајте ја цврсто во ролат и исечете ролатчиња од 1 см.
- Истата постапка повторете ја и со останатиот дел од тестото, само што на оваа кора ќе ја изрендате кората од лимон.
- Готовите ролати пржете ги во поголема количина на масло, на средна температура да добијат светла кремаста боја.
- Штом се испржени, посипете ги со шеќер во прав и на здравје!
Рецептот го испратил: Невена Ѓероска.
Ви препорачуваме да прочитате: Рецепт за популарните италијански колачиња струфоли.