Струфоли се италијански пржени колачиња кои потекнуваат од областа на Неапол. Имаат крцкава кора и мека внатрешност. Традиционално се приготвуваат со прелив од мед, шеќерни трошки, цимет и кора од портокал. Сепак, постојат различни варијации, но вкусот е сличен.
Овој пат рецепт за струфоли ни испрати Невена. Малите вкусни колачиња изгледаат преубаво и вреди да се пробаат. Таа за овој рецепт вели: „Овие италијански пржени колачиња обично се прават за Божиќ или за време на карневалските денови, но моите деца ги сакаат и затоа почесто си ги правиме.“
Состојки:
- 2 јајца
- 3 лажици шеќер
- 30 гр путер или свинска маст
- 1 лажица рум, мастика, бренди или ликер од лимон
- рендана кора од половина лимон и портокал
- прстофат сол
- 200 гр брашно
- масло за пржење.
Прелив:
- 150 гр мед
- 2 лажици шарени шеќерни трошки.
Подготовка:
- Во сад за месење ставете ги јајцата, шеќерот, путерот, румот, кората од лимон и портокал, солта и брашното. Убаво измесете за да се добие изедначено тврдо тесто. Готовото тесто покријте го со кујнска крпа и оставете го да одмори најмалку половина час.
- Потоа премесете го. Од тестото формирајте стапчиња со дебелина колку еден прст. Со нож исечете ги на многу мали парчиња.
- Штом струфолите се готови, во повисока тава или тенџере ставете поголема количина на масло да се загрее на умерена температура.
- Во загреаното масло ставете ги струфолите. Пржете ги додека добијат кремаста боја, а внимавајте да не потенат.
- Пржените колачиња извадете ги на кујнска салфетка за да се впие вишокот на масло.
- Медот ставете го во тенџере и загрејте го колку да се растопи. Додајте ги струфолите, шеќерните трошки и убаво измешајте. Готовите струфоли префрлете ги во голема чинија и послужете. На здравје!
Рецептот го испратил: Невена Ѓероска.
Ви предлагаме да прочитате: Најдобриот испробан рецепт за домашни крофни.