Чоколадна слатка погача 0

Чоколадна слатка погача – за вселување и други убави пригоди

„Вселувањето е пригода при која обичај е во домот да има погача, па ви приготвив нешто специјално во мојата кујна –  чоколадна слатка погача која ќе ги освои домашните и гостите, сите кои ќе ја пробаат! И не само за тоа, за разни прослави, свечености и радосни моменти, ве охрабрувам да ја пробате, сигурна сум дека ќе си го запишете рецептот!“ – вели Катерина Шамбевска Спасеновска од нашиот тим, која ja направи прекрасната чоколадна погача.

„Мојата погача внесе радост во нашиот дом, а чоколадниот вкус неизбежно беше да го уживаме заедно со шолјичка Браво кафе. За секој ден или за посебни пригоди, ова е нешто кое мора да го пробате!“ – додава Катерина.

Чоколадна слатка погача

Состојки:

  • ½ коцка квасец со 1 лажица шеќер, 75 мл млака вода и 1 лажица брашно
  • 150 мл млака вода
  • 150 мл млеко
  • 50 мл масло
  • 50 гр стопен и изладен путер
  • 1 јајце
  • 100 гр шеќер
  • 1 ќесичка ванилин шеќер
  • кора од ½ лимон
  • 500 г брашно + околу 250 гр за домесување – по потреба.

За фил:

  • 300 г чоколаден крем
  • 10-15 сечкани бадеми за одозгора

За премачкување:

  • Пред печење: 1 матено јајце
  • По печење: 40 г стопено чоколадо.
Чоколадна слатка погача чекор по чекор

Подготовка:

  1. Во сад ставете ги квасецот, шеќерот, млаката вода и брашното. Промешајте и оставете 15-20 минути да нарасне. Брашното пресејте го да е спремно.
  2. Во садот додајте ги сите состојки и со миксер матете го тестото 8-10 минути. Кога е убаво соединето, покријте го со најлонска фолија и оставете го да нарасне 1.5 до 2 часа.
  3. Нараснатото тесто ќе биде течно, но со убави меурчиња кои значат дека ќе е меко и со конци. Додајте брашно по потреба. Замесете со раце за да се оформи доста меко тесто, но да може да се работи и формира.
  4. Со помош на сукало, направете правоаголна кора со дебелина од 7 мм и нанесете го чоколадниот крем, оставајќи по 2 см на краевите. Замотајте ролна, па засечете ја по должина и од 2-те нишки со преклопување направете „плетенка“. Земете тркалезен калап (бр.26) во близина и формирајте спирала/во вид на полжав. Поросете малку сечкани бадеми во средишниот дел.
  5. Оформената чоколадна погача оставете ја да нарасне 45-50 минути, па премачкајте ја со изматеното јајце на местата без чоколаден крем. Печете во загреана рерна на 180 степени 25 минути, па намалете на 150 степени и печете уште 50 минути.
  6. На крај, со кујнска четка чоколадирајте ја горната површина и поросете со сечкани бадеми за декорација. Направете си филџан од најдоброто Браво кафе и на здравје!
Чоколадна слатка погача 2 Чоколадна слатка погача 6 Чоколадна слатка погача 3

Совети плус: 

  • За да добиете убава спирала, правоаголната кора треба да е долга 50-60 см, инаку ќе треба да ја споите во калапот.
  • Кога ја оформувате погачата, калапот нека ви биде многу блиску, бидејќи тестото е меко и од засекот ќе се пренесе чоколадниот крем, па е потребна малку вештина за да не ви се тенчи и разлева во пренесувањето, воедно и да го задржи ликот. 
  • При печењето, зависно од рерната, одозгора ставете хартија за печење, за да не потемни премногу. За вкус ќе е одлична, а ова е совет ако сакате да е посветла. Јас одлучив да ја чоколадирам и одозгора за да е комплетно чоколадна.
  • Ако сакате да добиете совршени парчиња кои не се ронато и со шари на пресек, почекајте потполно да се излади, па потоа пресечете ја. 
Чоколадна слатка погача 4

Препорака од авторот:

Нашата култура има доблести кои и тоа како е убаво да се негуваат, меѓу нив е радоста за вселување во нов дом, па како тема ми беше инспиративна да ви приготвам нешто специјално. Ако ви се допадна мојот рецепт и љубовта со која ја припремам и прикажувам храната, разгледајте ги моите профили каде објавувам испробани рецепти креирани во мојата кујна и заследете ме:

Чоколадна слатка погача 5

Автор на рецепт и фотографии: Катерина Шамбевска Спасеновска, @katerina.shambevska.

Ви препорачуваме да прочитате: Постапалки во 2 вкусови – Лесни колачиња за лесни чекорчиња.

Следете ја sezahrana.mk и на Instagram и Pinterest.

*Спонзориран рецепт.

Сподели: