Новогодишните празници доаѓаат, а на секоја свечена трпеза големо внимание привлекува празничната декорација на салфетки, посебно ако истите се декорирани во вид на ѕвезда, круна или лист. Откако сите специјалитети се подготвени, време е да им се посветите на чиниите, салфетките и приборот за јадење.
Доколку немате идеја, следете ги инструкциите и погледнете го видеото со трите предлози – круна, лист и ѕвезда кои совршено ќе се вклопат на празничната трпеза. Потребно ви е малку време и хартиени салфетки со димензии и боја по ваш избор.
Техника за декорација на салфетки во форма на круна
- Салфетката отворете ја така што ќе добиете форма на правоаголник. Потоа, едниот крај на салфетката превиткајте го кон центарот во форма на триаголник. Постапката повторете ја и со другиот крај.
- Салфетката внимателно свртете ја на другата страна и превиткајте ја хоризонтално, при што ќе ги оставите врвовите да не бидат свиткани.
- Потоа, почнувајќи од краевите превиткајте една третина кон центарот на салфетката и вовлечете го крајот во внатрешноста. Повторно свртете ја салфетката и повторете ја постапката, така што и другиот крај ќе го превиткате за една третина кон внатрешноста. Вака формираната салфетка во форма на круна, отворете ја и поставете ја во чинијата.
Техника за декорација на салфетки во форма на лист
- Салфетката целосно отворете ја и превиткајте ја дијагонално, така што ќе добиете форма на триаголник.
- Од долната страна на триаголникот, превиткајте хоризонтално со ширина од околу 1 см. Потоа, свртете ја салфетката од другата страна и повторете ја постапката. Овој начин на превиткување продолжете го до врвот на салфетката, така што треба да добиете форма на лепеза.
- Салфетката свиткајте ја на половина во центарот, а двата краеви спојте ги со мала шнола за коса.
Техника за декорација на салфетки во форма на ѕвезда
- Салфетката целосно отворете ја и горниот дел хоризонтално превиткајте го на половина кон внатрешноста. Постапката повторете ја и со долниот дел на салфетката, така што треба да добиете форма на правоаголник.
- Потоа, правоаголникот свртете го, така што пократките страни треба да бидат горен и долен дел. Започнете со превиткување хоризонтално, исто како да формирате лепеза.
- Краевите на лепезата, превиткајте ги во внатрешноста, за да добиете форма на триаголници. На крај отворете ја салфетката, формирајте ѕвезда, а краевите прицврстете ги со мали шноли за коса.