Готвиме со Марија Кочовска: 3 брзи и лесни десерти • Сè за храна

Ви се пријаде нешто благо, а не сакате да губите многу време за готвење? – Чоколадна торта, чоколадна салама, или пак грклани со ванила фил, се 3 брзи и лесни десерти топло препорачани од нашата уредничка Марија Кочовска. Кој и да го изберете, нема да згрешите.

„Чести ги правам, сите 3 се превкусни. Затоа не би можела да издвојам кој ми е омилен. Затоа препорачувам да ги пробате и тортата, и саламата, и гркланите.“ – вели Марија.

Брза непечена чоколадна торта со бисквити за 5 минути

Состојки:

200 грама бисквити
200 грама чоколадо за готвење
5 крем банани
1 лажица екстракт од ванила
100 мл млеко.

Подготовка:

Бисквитите искршете ги со раце или исечкајте ги.
Крем бананите исечкајте ги на мали коцки.
Во тенџере на оган на ниска температура ставете го млекото и додајте го чоколадото искршено на коцки. Мешајте со лажица за да се растопи чоколадото. Потоа, додајте го екстрактот од ванила и измешајте.
Штом чоколадото се растопи, тенџерето тргнете го од оган.
Во растопеното чоколадо додајте ги кршените бисквити и крем бананите. Измешајте убаво.
Во калап или пластичен правоаголен сад ставете најлонска фолија. Во калапот додајте ја смесата од бисквитите и чоколадото. Убаво израмнете со лажица. Врз тортата ставете најлонска фолија и со рацете добро притиснете. Калапот затворете го со капак и ставете го во замрзнувач.
Оставете ја тортата за време од 1 до 2 часа додека се стегне. Изладената непечена чоколадна торта исечете ја на парчиња и послужете ја. На здравје!

Брза чоколадна салама за 10 минути

Состојки:

100 мл вода
1 лажица шеќер во прав
1 ќесичка ванилин шеќер
100 грама чоколадо за готвење
200 грама мелени бисквити
200 грама сечкани желе бонбони
шеќер во прав за декорација.

Подготовка:

Водата, шеќерот и ванилиниот шеќер ставете ги во тенџере на оган. Повремено мешајте ги за да се растопи шеќерот.
Штом шербетот ќе зоврие тенџерето тргнете го и додајте 100 грама чоколадо за готвење претходно искршено на коцки. Мешајте за да се растопи.
Во тенџерето додајте ги мелените бисквити и сечканите желе бонбони. Измешајте за да се добие хомогена смеса.
Врз најлонска фолија ставете ја смесата. Обликувајте ја во форма на салама. Чоколадната салама ставете ја во фрижидер за време од 1 час. Извадете ја од фолијата, поросете ја со шеќер во прав и исечете колачи.

Брзи грклани со ванила фил

Состојки:

1.5 кг лиснато тесто
2 ќесички крем пудинг со вкус на ванила без варење
2 ќесички шлаг пен
800 мл млеко
100 г шеќер во прав
1 ќесичка желатин
50 мл вода
путер или маргарин по потреба
50 г чоколадо за готвење за декорација.

Подготовка:

Калапите за гркланите премачкајте ги со тенок слој на путер или маргарин.
Лиснатото тесто исучете го како тенка кора со дебелина од 3-4 мм. Потоа исечете долги ленти со ширина од 3-4 см и должина 30 см (во зависност од големината на калапите).
Земете една лента и вртете ја околу калапот во форма на спирала. Лентата треба да се преклопува.
Формираните грклани наредете ги во плех обложен со хартија за печење. Од наведената количина на тесто треба да добиете 36 парчиња, кои се печат во 3 плеха. По потреба количината на состојките намалете ја или зголемете ја.
Гркланите ставете ги да се печат во загреана рерна на 220 степени за време од 10 минути, додека поруменат. Печете еден по еден плех за најдобри резултати.
Извадете ја тавата и оставете ги гркланите да се изладат кратко, а потоа извадете ги од калапите.
Во сад за матење ставете ги крем пудинзите од ванила и додајте 600 мл млеко. Изматете со миксер за време од 3-4 минути додека се добие густ крем.
Во друг сад за матење ставете ја шлаг пената и додајте 200 мл млеко. Изматете со миксер за време од 3-5 минути додека се добие густ шлаг. Во садот со крем пудингот додајте ја шлаг пената и изматете кратко за да се соединат состојките. По желба додајте шеќер во прав.
Во чаша или друг сад ставете го желатинот и додајте 50 мл вода. Измешајте и оставете го да набабри за време од 3 минути. Желатинот растопете го на оган или во микробранова печка, притоа внимавајте да не зоврие.
Во садот со пудингот додајте го желатинот и изматете со миксер околу минута до две. Филот оставете го 10-20 минути.
Потоа, со готварски шприц наполнете ги гркланите. По желба декорирајте ги со изматена шлаг пена на краевите и поросете ги со шеќер во прав и растопено чоколадо пред служењето. Уживајте во светот на вкусовите!

Препорака од авторот:

Се надевам дека ти се допаднаа овие брзи и лесни рецепти и дека те мотивирав да направиш барем еден од нив. А, ако си во потрага и по други рецепти и идеи, посети ги моите профили на социјалните мрежи и пронајди ја твојата инспирација. Може да ме следиш и да разгледаш повеќе рецепти на: