Ако нас не запрашате, домашното слатко од смокви е еден од највкусните десерти кои се подготвуваат од овошје. Ценети и обожавани од многумина, нетрпеливо очекувани од деца и возрасни, такви се тие, безгранично задоволство кое со години на назад е третирано и добило епитет за кралско слатко.
Оние кои правеле слатко од смокви, знаат дека постапката е малку долга и мачна, но вредна да се издржи, а најинтересен факт за нивната подготовка е во народот познатото варење во 9 води, за смоквите да се ослободат од состојките кои не се корисни за организмот. Ви предлагаме да го пробате нашот рецепт, кој сме го пробале многу пати и секој пат домашното слатко од смокви излегува фантастично вкусно. Дозата е мала, па доколку сакате повеќе, слободно зголемете ја.
Состојки:
- 1 кг смокви
- 1 лимон.
За шербет:
- 3 кг шеќер
- 750 мл вода.
Подготовка:
- Смоквите најпрво се мијат и им се сечат дршките, а потоа се боцкаат со остар предмет на неколку места за да може шербетот подобро да навлезе.
- Така припремени се ставаат да се варат во вода, при што откако водата ќе зоврие се цеди и се става нова. Постапката се повторува 9 пати, односно водата се менува 9 пати.
- Потоа, се цедат во поголема цедалка, а во меѓувреме се подготвува шербетот.
- Во длабок сад на оган се става шеќерот и водата. Шербетот е готов кога по одредено време се забележува дека се формирала густа содржина.
- Кога шербетот е доволно густ, се додаваат претходно исцедените смокви и заедно се варат уште 1 час.
- Непосредно пред крајот се додава 1 лимон, сечкан на кришки.
- Топлото слатко од смокви се собира во тегли, а штом се излади може да сервирате симпатичен и вкусен десерт на вашите мили и гости.
Пријатен апетит!
Ви предлагаме да прочитате: Џем од смокви.