Лиснати морковчиња полнети со крем салата од јајца • Сè за храна

Додадете ѝ на вашата велигденска трпеза празничен допир и послужете ги овие лиснати морковчиња полнети со крем салата од јајца!

Подготовката е многу забавна и во неа може да ужива целото семејство. Рецептот го најдовме на Инстаграм профилот на @sika_spices и со радост го споделуваме со вас.

Состојки:

За морковчињата:

кора од лиснато тесто (има во подобро снабдените маркети)
јајце за премачкување
1 лажичка мелена слатка црвена пиперка.

За крем салатата од јајца:

2 средно големи варени компири
3 варени јајца
50 г фета сирење
250 г крем сирење
2 лажици мајонез
1 лажица шарена сол Сика (блага или лута по ваш вкус)
сол и црн пипер по вкус

За украсување:

свеж копар или магдонос по потреба.

Подготовка:

За да ги направите лиснатите морковчиња, потребни ви се конусни калапчиња за печење. А доколку немате, сами направете од алуминиумска фолија.
Кората од лиснато тесто ја расекуваме на ленти со ширина околу 2 см и должина околу 30 см. Ги обвиткуваме калапчињата и ги ставаме на хартија за печење со шпицестиот крај нагоре.
Од горе ги премачкуваме со разматено јајце во кое сме додале 1 лажичка црвен пипер. Печиме во загреана рерна на 200 степени, за време од 15-20 минути. Кората која ја употребивме за овој рецепт беше 275 г и од неа излегоа 10 морковчиња.
Подгответе ја салатата за полнење. Варените компири, варените јајцата и сирењето изрендајте ги, а потоа додадете ги останатите состојки и убаво измешајте. Украсете со свеж копар или магдонос. Среќни празници!