Секој ден може да си го направите посладок со овие симпатични и превкусни срце колачи исполнети со богат слој на крем од бело чоколадо. Без разлика дали имате некаков повод за прославување или не, секој ден е добра прилика за да и направите на саканата личност прекрасен десерт во облик на срце.
Интересното кај овој десерт е тоа што во себе содржи и зеленчук. Иако, на прв поглед тешко е да се поверува во тоа, всушност прекрасната црвена боја на пандишпанот се должи на цвеклото од кое е направен истиот. Ние секогаш се стремиме во нашите рецепти да користиме природни бои и ароми, па секогаш кога е тоа возможно избираме природни намирници за да добиеме убава боја или вкус на храната. Еве што ви е потребно и како да ги направите.
Состојки:
За пандишпан:
- 3 поголеми цвекла
- ¾ чаша масло
- 1/2 чаша кафеав шеќер
- 2/3 чаша шеќер во прав
- 2 јајца
- 1 ¼ чаши брашно
- 1 лажица какао во прав
- 1 лажичка цимет
- 1 лажичка прашок за печиво
- ¼ лажичка сол
За крем од бело чоколадо:
- 200 гр омекнат путер на собна температура
- 170 гр стопено бело чоколадо
- 1 чаша шеќер во прав
- 1 лажичка екстракт од ванила
За декорација:
- шлаг крем по потреба
- џем од јагоди или малини
Подготовка:
- Прво започнете се подготовка на пандишпанот. Цвеклото темелно измијте го и излупете го, па сварете го. Откако ќе се излади, со помош на блендер, претворете го во пире.
- Потоа, со миксер изматете ги шеќерот во прав, кафеавиот шеќер и маслото. Додека се уште матите, додајте ги јајцата и миксирајте додека добиете хомогена смеса. Оваа смеса додајте ја во изблендираното цвекло.
- Во брашното додајте ги прашокот за печиво, какаото, циметот и солта. Добро промешајте, а потоа додајте ги во смесата со пире од цвекло. Мешајте додека добиете хомогено тесто.
- Плехот за печење (со големина од 20*30 см) обложете го со хартија за печење, а страните премачкајте ги со путер.
- Вака подготвеното тесто турете го во припремениот плех и ставете го да се печи во загреана рерна на 180 степени, за време од 25 до 30 минути.
- Испечениот колач оставете го да се излади во целост, а во меѓувреме подгответе го кремот од бело чоколадо.
- Во поголем сад, со миксер на средна брзина матете го путерот додека се претвори во крем.
- Чоколадото искршете го на коцки, па растопете го на пареа. Откако малку ќе се излади, додајте го во изматениот путер и измешајте ги со цел да добиете хомогена смеса.
- На крај, во вака добиениот крем додајте ги шеќерот и екстрактот од ванила, па повторно со миксер на најмала брзина изматете со цел да добиете убава кремаста структура.
- Откако пандишпанот добро ќе се излади, со помош на калап во форма на срце вадете фигури од него. Во зависност од големината на калапот треба да добиете околу 10-12 колачи.
- Секое колаче пресечете го на половина, така што од секое срце ќе добиете два дела.
- Едната половина од срцето филувајте ја со богат слој на крем од бело чоколадо, па спојте го со другата половина. Повторете ја постапката со сите колачиња.
- На крај, изматете го шлаг кремот и премачкајте ги со него, па прелијте ги со џем од јагоди или малини и вашите срце колачи се спремни за дегустација!
Ви препорачуваме да прочитате: Здрав колач со цреши.