Која храна има фолна киселина (витамин Б9) и за што служи во организмот? • Сè за храна

Фолната киселина многу често се препорачува (во форма на суплементи) кај трудниците, а ова е последица на резултатите од студиите и истражувањата кои покажале дека доволниот внес на фолна киселина е поврзан со помалку дефекти на невралната туба (од неа подоцна се формираат черепниот и ’рбетниот мозок) кај новороденчињата.

Ова не е единствена примена и функција на фолната киселина, на пример Б9 суплементи се даваат и кај некои анемични состојби предизвикани токму од недостатокот на фолната киселина. Ако сакате да дознаете повеќе за овој витамин, прочитајте го следниот текст.

Што претставува фолната киселина?

Фолната киселина е хидросолубилен витамин (растворлив во вода), кој е дел од Б-комплексот на витамини.

Која храна има фолна киселина (витамин Б9) и за што служи во организмот? 2

Кои се функциите на фолната киселина во нашиот организам?

Фолната киселина:

Е вклучена во претворањето на јаглехидратите во енергија и во правилното искористување на мастите и протеините
Има многу голема улога во правилна функција на мозокот, во одржување на менталното и емоционалното здравје
Помага во продукцијата на ДНA и РНA и особено е важна при растот на ткивата и органите (што е најмногу изразено во детството, бременоста, адолесценцијата)
Заедно со витаминот Б-12 се вклучени во продукција на црвени крвни клетки
Заедно со витамините Б-6, Б-12 и некои други нутриенти го регулираат нивото на аминокиселината хомоцистеин во крвта (чие високо ниво е поврзано со поголем ризик од кардиоваскуларни заболувања).

Која храна е богата со фолна киселина?

Намирници богати со фолна киселина се: темно зелен листест зеленчук, аспарагус, брокула, цитрусни овошја (лимон, портокал, грејпфрут, цитрон), грав, грашок и леќа, авокадо, бамја, прокељ, сончоглед, кикирики, бадеми, ленено семе, карфиол, цвекло, пченка, морков, тиква.