Сигурно сте слушнале за големите придобивки од консумацијата на мед, но комбинацијата со ореви е прав избор за здравјето. Оревите изобилуваат со хранливи состојки, а заедно со медот се добива енергетска „бомба“ која често се користи како народен лек при анемија, покачен крвен притисок и чир на желудникот. Па, во комбинација, овие две намирници го снабдуваат организмот со речиси сите потребни витамини и минерали. Затоа, народот со векови ги употребува во народната медицина за правење на многу домашни лекови од мед со ореви.
Во продолжение прочитајте неколку комбинации чии главни состојки се токму оревите и медот. Ви гарантираме дека повкусен „лек“ никогаш не сте пробале!
Комбинација од ореви со мед против висок крвен притисок
Високиот крвен притисок или хипертензија е честа здравствена состојба која се среќава кај 60% од луѓето на возраст над 65 години. Треба да се обрне големо внимание на оваа тема затоа што високиот крвен притисок претставува прикриена и сериозна закана за здравјето. Ако имате хипертензија ви препорачуваме да ги прочитате 8-те совети кои ќе ви помогнат при висок крвен притисок и да ја вклучите слатката комбинација од мед и ореви.
Состојки:
- 30 г ореви
- 30 г природен мед.
Подготовка и начин на употреба:
- Во сад помешајте 30 г ореви со 30 г мед.
- Оваа мешавина треба да се изеде за еден ден, а за најдобри резултати треба да се консумира секојдневно во период од 45 денови.
Комбинација од мед со ореви против анемија
На денешно време анемијата е сѐ почеста појава, а ретко кој прво се запрашува дали може да ја излечи по природен пат, туку прво посегнува по лекови. Треба да знаете дека крвта е може да ја зајакнете со природни состојки, па медот и оревите се прв избор. Ако имате низок хемоглобин и железо прочитајте ги овие совети како и пригответе ја комбинацијата со мед и ореви.
Состојки:
- ½ кг природен мед (препорачуваме да користите дабов или планински мед)
- ½ кг мелени ореви
- сок од 1 лимон.
Подготовка и начин на употреба:
- Во ½ килограм мед ставете ½ килограм мелени ореви и сок од еден лимон.
- Сите состојки добро измешајте ги.
- Лекот против анемија од мед и ореви чувајте го во чиста тегла на темно и суво место.
- Од вака подготвениот мед јадете по 1 супена лажица, 3 пати на ден.
„Млеко“ од ореви и мед против чир на желудник
Направете си вкусно „млеко“ од ореви и мед и пијте го пред секој оброк. Тоа може да ви помогне за намалување на симптомите при чир на желудникот.
Состојки:
- 2 лажици ситно мелени ореви
- 1 чаша топла вода
- 2 лажички мед.
Подготовка и начин на употреба:
- Мелените ореви измешајте ги со топла вода. Ставете ги во блендер и миксирајте додека добиете млеко. По желба, млекото од ореви процедете го. На крај додајте 2 лажички мед и измешајте.
- Од вака подготвеното млеко од ореви засладено со мед пијте по 2-3 лажици пред секој оброк.
Ви препорачуваме да прочитате: Направете лек со мед и ореви за зајакнување на имунитетот.