Вкусен оброк за 5 минути и тоа може да го приготви секој кој ќе посака! Да, да, баш како што читате, навистина се потребни само неколку минути и нема никаква комплекснот! Во наредните пет минути веќе ќе бидете седнати на трпезата и ќе уживате во јадењето. За наутро како појадок или за кога што ќе останете без идеја што да јадете, пробајте ја нашата експресно брза палента со тиквички и магдонос.
Често пати, во моментите како што ние се инспириравме за овој рецепт, може да имаме недоволно време за сите задачи кои треба да ги завршиме во денот. Тогаш проработува креативноста и се создава едноставна и добра идеја. Ако имате желба за нешто ново или едноставно ви е потребно нешто брзинско и сакате да зготвите хранлив и вкусен оброк, вреди да пробате. Одлично е за целото семејство.
Може да ве интересира: Како да направите совршена палента?
Состојки:
- 1/2 чаша палента
- 1 чаша вода
- 1 помала или половина од поголема тиквичка
- свеж магдонос по потреба (ливчињата од 10-тина гранчиња, зависно од големината)
- 1 лажиче путер
- хималајска сол по вкус
- малку бело сирење за сервирање/декорација по желба.
Подготовка:
- Водата ставете ја во сад на оган и оставете да зоврие.
- Во меѓувреме измијте ја, излупете ја и изрендајте ја тиквичката, па веднаш додадете ја во садот со водата на оган. Оставете да врие само 2-3 минути.
- За тоа време измијте го магдоносот и малку исечкајте го, па додајте го во садот со водата која врие.
- Исто така, додајте го и путерот, нема потреба да е запржен, доволно е да се стопи и да се разнесе аромата низ течноста.
- Не мора да чекате, туку последователно ја додавате и палентата, а при тоа треба постојано да мешате со жица за матење уште 2-3 минути и јадењето е готово.
- Сервирајте топло и по желба декорирајте со малку рендано сирење и гранче магдонос. На здравје!
Ви препорачуваме да прочитате: “Кашел” пикантна палента со зеленчук.