Кога сакате да користите намази, било тоа да се слатки или солени, доколку имате малку време предлагаме да си правите дома. Ваквиот домашен џем од моркови е еден вид на здрав намаз кој ќе ве снабди со убава енергија во наредните неколку часа после појадокот.
Топло препорачуваме да го премачкате лепчето на вашите најмили, а знаете нели дека штом нешто е препорачливо за дечиња мора да е здраво! Само неколку состојки и ќе го пробате вкусот кој создава насмевки. Уживајте и на здравје!
Состојки:
- 1 кг моркови
- 0.5 литри вода
- 500 гр кафеав шеќер или 400 мл мед
- 1 лимон (сок и изрендана кора)
- 1 портокал (сок и изрендана кора)
- 1/2 кесичка цимет (околу 5 гр, а може да ја измените количината по желба).
Подготовка:
- Морковите најпрво измијте ги, исчистете ги, а потоа изрендајте ги.
- Земете средно големо тенџере и наредете го дното со првиот слој моркови (половина од ренданите моркови).
- Врз нив посипете од кафеавиот шеќер или налејте од медот.
- Сокот од лимонот и портокалот може да бидат исцедени во заеднички сад. Од него налевајте по малку врз двата слоја. Додајте и од ренданите трошки од кората од лимонот и портокалот.
- Посипете со малку цимет.
- Повторете ја постапката со вториот слој.
- Откако завршивте со редењето на состојките, во тенџерето турете ја водата.
- Џемот треба да се вари на тивок оган, барем 3-4 часа за убаво да се згусне, а при тоа треба повремено да се меша.
- Готовиот домашен џем од моркови се собира во тегли додека е топол, па се остава да се излади.
Ви препорачуваме да прочитате: Ароматичен џем од круши.