Пролетта е како создадена за прошетки во природа и излети на свеж воздух. Па, спакувајте го ќебенцето и корпата за пикник, направете ги овие вкусни домашни лепчиња со маслинки и посетете ја најблиската ливада и уживајте во прекрасното топло време. Рецептот ни доаѓа од кујната на Лана, а вие знаете дека сите нејзини јадења се вистинско ремек дело.
Исто така, овие лепчиња се идеални за сите оние на кои им е досадено правењето на традиционални кифли. За разлика од нив, се прават лесно и брзо, па ќе имате повеќе време кое може да го искористите за уживање во убавото време.
Состојки:
- 500 г брашно
- 1 лажичка шеќер
- 25 г свеж квасец
- 1 лажичка сол
- 200 мл млеко
- 75 мл масло
- 75 мл сок од домати
- 100 г зелени маслинки без семка.
Подготовка:
- Во длабок сад за месење ставете ги квасецот, топлото млеко, 1 лажичка брашно и шеќер. Измешајте ги сите состојки за да се растопи квасецот. Садот ставете го на топло место неколку минути за да се активира квасецот.
- Откако квасецот ќе нарасне, во садот додајте го и просеаното брашно, солта, маслото и сокот од домати. Топлото млеко додавајте го постепено во смесата и притоа со помош на раце замесете средно меко тесто. Замесеното тесто покријте го со кујнска крпа и оставете го да нарасне околу 30 минути.
- Од нараснатото тесто обликувајте мали топчиња. Секое топче развлечете го во долгнавеста форма на кифла. Во средината на секое лепче втиснете по неколку зелени маслинки без семка. Маслинките треба добро да се втиснат во тестото за истите да не се одлепат за време на печењето.
- Вака подготвените лепчиња со маслинки печете ги во претходно загреана рерна на 200 степени околу 20 минути.
Ви препорачуваме да прочитате: Посно селско лепче со ржано и бело брашно.