Ако сакате вашето јадење да има прекрасен и потполн вкус богат со витамини и хранливи материи, искористете го фантастичниот предлог на Клара за кремаст прилог од ориз и моркови. Може да го комбинирате како прилог со пилешко месо, стек, кременадли или пак риба. Вкусот е многу прилагодлив!
Во рецептот користевме ориз со долго зрно, а доколку немате таков можете да го пробате рецептот со поинаков ориз.
Состојки:
- 125 гр ориз со долго зрно
- 500 гр моркови
- 7-8 ливчиња свеж босилек
- 1 лажиче мешавина италијански зачини
- 1 лажица мешан сув зачин
- малку сол и црн бибер
- 400 мл павлака за готвење.
Подготовка:
- Најпрво во зовриена и малку посолена вода ставете го оризот да се вари за време од околу 20 минути. Откако сте го свариле исцедете го.
- Морковите исчистени и измиени се сечкаат на кругови, а потоа се ставаат на малку маслиново масло да се пржат околу 5 минути при што треба постојано да мешате за да не дојде до нивно загорување.
- Во садот во кој се пржат морковите се налева вода (околу половина литар, а по потреба слободно додадете) и се динстаат околку 20 минути за да омекнат и водата да испари.
- Потоа во садот се додава исцедениот ориз, зачините, сечканиот босилек и павлаката.
- На крај уште кратко време се меша врз исклучена рингла, додека павлаката се измеша со состојките и малку згусти, односно додека прилогот стане кремаст. Веднаш потоа се трга од оган.
- Кремастиот прилог од ориз и моркови најдобар е кога се служи топол.
По желба може да додадете и малку грашок од конзерва. Тој е веќе термички обработен, па може да го додадете заедно со оризот. Често пати немаме свеж босилек, па може и без него. Веќе го има како сув во мешавината италијански зачини и по желба и вкус можи да си додадете сув или доколку некој посакува, наместо свеж босилек можи да стави магдонос.
На здравје!
Рецептот го испратил: Клара Бос.