Кремасто, ароматично и превкусно! Тоа е она што го прави италијанското рижото омилено јадење на многумина. Скоро секој италијански град има свој традиционален рецепт за подготовка на овој специјалитет. Може да се направи со зеленчук, печурки и разни зачини, а ние ви предлагаме да пробате рижото со пилешко месо и грашок. Нема да ви одземе многу време, а сигурни сме дека ќе им се допадне на сите!
Ова е одличен предлог за оние денови кога немате идеја што да зготвите, а ви останало пилешко месо од претходниот ден или ручек. А за да го направите овој рецепт за рижото со пилешко месо и грашок не треба да сте професионалец во кујната. Доволно е да имате желба и да ги следите чекорите за подготовка. Сигурни сме дека ќе направите специјалитет како од врвен италијански ресторан.
Состојки:
- 250 г приготвен (варен, пржен или печен) пилешки стек
- 200 г замрзнат грашок
- 2 лажици маслиново или сончогледово масло
- 1 главица кромид
- 2 чешниња лук
- 250 г ориз
- 100 мл бело вино
- 1 коцка за пилешка супа
- 75 г пармезан
- 25 г путер
- сол и црн пипер по вкус.
Подготовка:
- Во тенџере на оган ставете 1 л вода да се вари. Во зовриената вода додајте ја коцката за супа и варете околу 5 минути.
- Кромидот и лукот ситно исечкајте ги.
- Во голема нелеплива тава на оган (на умерена температура) и загрејте го маслото. Додајте ги кромидот и лукот и пржете 2-3 минути додека омекнат.
- Додајте го оризот и убаво измешајте. Ставете половина од виното и оставете да испари 30-40 секунди. Потоа, додајте го пилешкиот бујон, измешајте и оставете да зоврие.
- Намалете ја температурата и оставете да вари околу 10 минути (без да биде тавата покриена со капак). Повремено мешајте додека рижотото стане кремасто. Потоа, додајте го преостанатото вино.
- Во тавата додајте го пилешкото месо исечкано на коцки и грашокот. Продолжете со варење уште 4-5 минути.
- Штом оризот омекни, тргнете ја тавата од оган. Додајте ги путерот и пармезанот, и измешајте. Зачинете со сол и црн пипер по вкус.
- Покријте ја тавата со капак и оставете ја 5 минути. Потоа сервирајте, декорирајте со свеж магдонос и пармезан по желба и послужете. На здравје!
Ви препорачуваме да прочитате: Домашна чорба со пилешко месо и зеленчук.