Најдобриот вегански мача чизкејк • Сè за храна

Вегански и без глутен! Рецептот за најдобриот вегански мача чизкејк ни го испрати нашата пријателка Марија, а ние со задоволство го споделуваме со вас. Taa вели: „Досега сум направила и пробала многу различни мача чизкејкови, но овој е дефинитивно најдобар од сите.“

Што е мача? Мача е прав од мелени листови од зелен чај. По бербата, листовите кратко стојат на пареа и се сушат. Од нив се чисти вишокот гранки и се мелат во препознатливиот зелен прав. Мачата има многу здравствени придобивки: ѝ дава сјај и еластичност на кожата, го намалува крвниот притисок, ги зајакнува коските, го регулира холестеролот и го подобрува расположението. Па, драги пријатели направете го најдобриот вегански мача чизкејк што поскоро.

Состојки:

За подлога:

1 чаша лешници
1 чаша ореви
1 чаша свежи урми без семка
1 лажица какао
½ чаша таан
1 лажица ванилин шеќер
1 лажица сусам.

За крем:

2 чаши индиски ореви
½ конзерва (околу 200 г) кокосово млеко
сок од ½ лимон
2 лажички просеана мача
¼ чаша јаворов сируп или агаве
1 лажица ванилин шеќер.

Подготовка:

Оревите, лешниците и урмите ставете ги во блендер и изблендирајте ги. Додајте ги ванилиниот шеќер, таанот и сусамот и блендирајте за да добиете хомогена смеса.
Смесата ставете ја во сад обложен со хартија за печење и убаво распоредете ја. Садот ставете го во фрижидер.
Индиските ореви прелијте ги со зовриена вода и оставете ги 20 минути. Потоа, изблендирајте ги. Додајте ги преостанатите состојки и блендирајте за да добиете хомогена смеса.
Добиената смеса прелијте ја врз претходно направената подлога и убаво распоредете ја. Чизкејкот оставете го во замрзнувач неколку часа за убаво да се стегне.
Подготвениот чизкејк исечете го на парчиња и послужете го. На здравје!