Ајде да ја отвориме сезоната на зимници! И оваа година нудиме најголем избор на проверени рецепти за подготовка на домашна зимница. Збогатете го вашиот тефтер со вкусни и пробани рецепти. Па така, оваа зима наместо да купувате конзервирани домати, подгответе ги сами дома.
Многу рецепти во подготовката бараат да се стават пелати, а дали сте знаеле дека се прават многу лесно и брзо, и може сами да ги подготвите дома? – Па, збогатете го вкусот на јадењата, манџите, тестенините и сите специјалитети со сочни пелати од тегла.
Состојки:
- 6 кг свежи домати
- 6 ловорови листови
- 20 листови свеж сечкан босилек
- 2 лажици шеќер
- 50 г црн пипер во зрно
- сол по вкус.
Подготовка:
- Најпрво одберете домати со помала големина, бидејќи подобро се редат во тегла. За подготовка користете долгунести домати.
- Потоа доматите добро измијте ги и ставете ги во сад со вода која врие и бланширајте ги околу 1 минута за да може полесно да ги излупите. Доколку доматите се убаво зрели и лушпата лесно се лупи, тогаш нема потреба од бланширање.
- Лупените домати ставете ги во широк сад или шерпа, посолете ги по вкус и додајте ги шеќерот, црниот пипер во зрно, иситнетите ловорови листови и исечканиот босилек. Добро измешајте да се соединат состојките.
- Теглите добро измијте ги и ставете ги во рерна на 100 степени околу 1 час за да се стерилизираат.
- Зачинетите домати наредете ги во стерилните изладени тегли. Оставете околу 1 прст празен простор на врвот од теглата и на крај добро затворете ги.
- Наполнетите тегли завиткајте ги во крпи/хартија така што капакот ќе биде откриен и наредете ги во длабок сад. Садот наполнете го со вода така што нивото ќе биде 3 прсти над теглите.
- Вака подготвените пелати варете ги околу 45 минути од мигот кога ќе зоврие водата.
- На крај оставете ги теглите постепено да се ладат во врелата вода. На здравје!
Наша препорака:
Пред подготовката на зимница, набавете си квалитетни и природни состојки кои ќе го збогатат нивниот вкус.
Ви препорачуваме да прочитате: Малиџано од црвени пиперки.