Сочно печено месо, пире и богат сос! Специјалитет како од рестораните, но овој пат, приготвен во вашиот дом од внимателно избрани и квалитетни состојки. Ако сте во потрага по нов, но лесен рецепт со кој ќе го изненадите семејството или пак гостите кои ги очекувате на вечера, ова е идеална прилика за вас.
Направете сочно печено свинско филе со богата арома на зачини, доматен сос и пире за комплетно надополнување на вкусовите. Најдобро од сѐ е што не мора да поминувате часови во кујната, а сепак ќе имате гурмаско јадење. Со малку труд и мешавина од зачини ќе добиете вистинска магија на вкусови! Би рекле, нешто што дефинитивно вреди да се проба!
Состојки:
- 2 парчиња свинско филе (можете да искористите кременадли или сечкано месо по желба)
- 1 лажичка лук во прав
- ½ лажичка сол
- ½ лажичка мелен црн пипер
- 1 лажичка кромид во прав
- 1 лажица масло.
За сос:
- 1 чешне лук
- 1 лажица масло
- ½ чаша кечап
- 2/3 чаша вода
- 1 мала лажичка црвена пипер
- 2-3 лаворови листови
- сол
- мелен црн пипер.
За инстант пире од компири:
- 1 кесичка инстант пире
- ½ литар вода
- 1 лажичка сол
- ¼ литар млеко
- 1 лажица путер.
Подготовка:
- Свинското филе измијте го.
- Зачините измешајте ги во помал сад.
- Миксот од зачини нанесете го на свинското филе. Добро истријте го месото за да се впијат зачините.
- На загреана тава ставете маслиново масло или путер да се загрее. Врз загреаното масло ставете го свинското месо и пржете го околу 2 минути од двете страни за да добие фина кора.
- Лукот ситно исечкајте го. Во длабок сад ставете ги сечканиот лук, маслото, кечапот, водата и црвената пипер. Измешајте и зачинете со сол и мелен црн пипер по вкус. Доколку сте љубител на сосови, додајте уште вода.
- Сосот ставете го над запрженото месо. Во тавата додајте ги и листовите лавор.
- Потоа, тавата со свинско месо ставете ја во претходно загреана рерна на 200 степени и печете го околу 20 минути.
- Во меѓувреме пригответе го пирето. Во тенџере на оган ставете ½ литар вода да се вари. Штом водата зоврие додајте сол и тргнете го тенџерето од огнот.
- Во тенџерето додајте ги млекото и содржината од кесичката за пирето. Измешајте и додајте го путерот. Оставете го пирето околу 10-тина секунди.
- Откако печеното месо ќе го извадите од рерна завиткајте го во фолија и оставете го да одмори 5-10 минути, па исечете го на парчиња. На тој начин месото ќе ги задржи сите сокови и нема да биде суво.
- Во чинијата ставете од приготвеното пире, бланширан зеленчук по желба и парчиња месо. Додајте сос и послужете го јадењето додека е топло.
Ви препорачуваме да прочитате: Сочни кременадли во сос.