Пикантни пилешки копанчиња од крилца со Бафало сос • Сè за храна

„Ова е најдобриот рецепт за подготовка на пилешки копанчиња од крилца! Дома сите ги обожаваат, па одлучив да снимам кратко видео од подготовката и да ве поканам да го испробате рецептот во првата прилика. Верувајте ми, една доза ќе биде малку. Ако обожавате пилешко месо и сте љубители на лута храна, ова е вистинскиот рецепт за вас. Пикантен специјалетет кој ќе ве воодушеви, а она што го прави посебен е познатиот американски сос. “ – вели Марија Кочовска уредник и фудблогер од нашиот тим.

„Сигурно сте пробале крилца подготвени на разни начини. Денес ви предлагам да ги пробате овие пилешки копанчиња од крилца кои се подготвуваат толку лесно што и почетниците во кујната може да се впуштаат во „авантура“ и да ги направат. Па драги пријатели, што чекате, засукајте ги ракавите и право во кујната!“ – додава Марија.

Пикантни пилешки копанчиња од крилца со Бафало сос

Состојки:

1 кг пилешки крилца (пилешки копан од крилца)
1 лажичка прашок за печиво
сол и црн пипер по вкус
1 лажичка лук во прав.

За Бафало сос:

¼ чаша растопен путер
¼ чаша лут сос (јас користев срирача)
¼ чаша кечап
1 лажичка кафеав шеќер.

Подготовка:

Рерната пуштете ја да се загрева на 200 степени. Во тавата за печење ставете нелеплива решетка.
Пилешките крилца исушете ги со кујнска хартија и ставете ги во посебен сад.
Во помал сад измешајте ги прашокот за печиво, лукот во прав, солта и мелениот црн пипер. Смесата додајте ја во садот со пилешките копанчиња и измешајте.
Пилешките копанчиња од крилца наредете ги на решетката и ставете ги да се печат околу 20 минути. Потоа, превртете ги од другата страна и печете уште 20-30 минути.
Кон крајот на печењето, подгответе го Бафало сосот. Путерот растопете го. Ставете ги сите состојки во посебен сад и измешајте за да добиете хомогена смеса.
Печените пилешки крилца извадете ги во длабока чинија. Прелијте ги со Бафало сосот, измешајте и повторно наредете ги на решетката. Печете ги дополнителни 3 до 5 минути.
Печените пилешки крилца сервирајте ги додека се топли со бел сос и свежа салата по избор. На здравје!

Подготовката може да ја погледнете и на видеото:

Совети плус:

За уште подобар вкус, крилцата послужете ги со бел сос. За да го направите потребни ви се: 2 лажици павлака, 50 мл јогурт, лук во прав, сол и оригано. Измешајте ги сите состојки, сервирајте и послужете.
Пред печење, тавата може да ја обложите со алуминиумска фолија, па над неа да ја ставите решетката со пилешките копанчиња.
Организирајте пикник со вашите најблиски, и наместо да ги печете во рерна подгответе ги на скара. Ќе бидат исто сочни, но ќе бидат многу повкусни!

Препорака од авторот:

Пикантните пилешки копанчиња од крилца во комбинација со Бафало сос се одлична идеја за денешниот ручек или за мезе со пријателите! А ако си во потрага и по други рецепти и идеи, посети ги моите профили на социјалните мрежи и заследиме на: