Нова комбинација за сите љубители на брзи и едноставни рецепти! За полесни пости и убави празнични трпези, ви приготвивме посни бомбици со кикирики и бело чоколадо. Овој рецепт е дел од априлскиот број на списанието Добра храна, а вториот рецепт ќе го објавиме наскоро.
Инспирација за подготовка на посните бомбици ни беа посните Сникерс бомбици. A овој пат ги пробавме со бело чоколадо кое му даде посебна арома.
Состојки:
- 100 мл вода
- 2 лажици шеќер
- 1 ќесичка ванилин шеќер
- 200 грама посно бело чоколадо
- 300 грама толчени или крупно мелени кикири за колачи
- 200 грама толчени или крупно мелени посни бисквити.
Приготвување:
- Водата, шеќерот и ванилиниот шеќер ставете ги во сад на оган. Повремено мешајте ги за да се растопи шеќерот.
- Чоколадото искршете го на коцки.
- Штом шербетот зоврие, садот тргнете го од огнот и додајте 100 грама чоколадо. Мешајте две до три минути за да се растопи чоколадото.
- Во садот додајте ги мелените бисквити и 200 грама мелени кикирики. Измешајте за да се добие хомогена смеса. Оставете смесата кратко да се излади за време од 10 до 15 минути.
- Од изладената смеса формирајте бомбици. Бомбиците ставете ги во замрзнувач за време од 2 до 3 часа, а најдобро е преку ноќ.
- Преостанатото чоколадо растопете го во сад на пареа или во микробранова печка. Бомбиците чоколадирајте ги и декорирајте со преостанатите кикирики. Повикајте ги пријателите и послужете ги со кафе!
Ви предлагаме да прочитате: Празнични бомбици со бело чоколадо и лешници.