Во последно време сме во потрага по вкусни, лесни и здрави грицки за долгите филмски вечери. А, и сакаме да експериментираме во кујната. Па, така, пробувајќи разни комбинации од семиња, го добивме рецептот за посни крекери и тоа без употреба на брашно.
Крекерите без брашно се супер идеја за сите оние кои постојано сакаат да грицкаат нешто, а сепак внимаваат на својата линија. Овие здрави грицки содржат низок процент на јаглехидрати и содржат здрави масти.
Состојки:
- ½ чаша ленено семе
- ½ чаша семки од сончоглед
- ½ чаша сусам или семки од тиква
- ¼ чаша млака вода
- прстофат хималајска сол
- зачини по желба: буковец, црн пипер, босилек, чили…
- по потреба 2-3 лажици мелени семки по желба за посипување на тестото.
Подготовка:
- Лененото семе, сончогледот и сусамот или семките од тиква сомелете ги со сечко или блендер.
- Сомелените семиња ставете ги во длабок сад. Додајте ја водата, зачинете и измешајте. Почекајте 10-15 минути додека семките ја впијат водата.
- Смесата поделете ја на два дела.
- Исечете две поголеми парчиња хартија за печење. Едниот дел од смесата ставете го помеѓу двете парчиња хартија. Истото направете го и со вториот дел.
- Расукајте ги тестата за да се истанчат отприлика до 2 мм дебелина. По потреба посипете со мелени семки за да не се залепат тестата.
- Извадете форми од смесата со помош на помала чаша или калап за крекери.
- Формираните крекери ставете го во плех обложен со хартија за печење.
- Печете во претходно загреана рерна на 150 степени, околу 10 минути. Бидете многу внимателни затоа што крекерите може брзо да изгорат.
Совет плус: Сусамот може да им даде малку горчлив вкус на крекерите, па може да го замените со семки од тиква.
Ви препорачуваме да прочитате: Здрави солени бисквити без глутен.