Во лето има најразновидно и највкусно овошје, нели? Сите ние ја користиме секоја прилика да уживаме во вкусот на летните плодови. Едно од многуте слатки овошја е и малината за која веруваме дека е најомилена кај децата. А што кога ќе помине летото и ќе заврши сезоната на малините? – За да не го заборавиме нивниот вкус и во зима супер би било да си направиме домашен сок од малини без варење.
Но, пред да започнеме со тоа, да ве запознаеме малку подетално со малините. Малината е бобичесто овошје чие латинско име е Rubus idaeus. Претставува зелјеста билка од семејството ружи. Се верува дека потекнува од Јужна Азија. Уште од дамнешни времиња, малината била ценета како лековита билка, а има и зошто. Имено, малината е богата со нутриенти и има широк спектар на лековити својства.
Богата е со антиоксиданси, содржи витамин Ц, како и ресвератрол кој го успорува стареењето и елагична киселина која делува антиканцерогено. Во нејзиниот состав има и растителни влакна, фолна киселина, витамин К, витамин Е, манган, магнезиум, бакар, калиум и омега 3 масни киселини.
Редовната консумација на малина ја разубавува кожата, ја зајакнува косата, го подобрува здравјето на дигестивниот и кардиоваскуларниот систем, го зајакнува имунитетот и штити од воспаленија. Малината го намалува дејството на на слободните радикали и штити од рак на дебело црево, дојка, матка и простата. Ако ги сакате директно да ги наберете од вашата градина, научете како да одгледате малини.
Сега, откако дознавме малку за здравствените придобивки, време е да си направиме домашен сок од малини без варење. Така ќе можеме да ги искористиме придобивките на малините и во зима.
Состојки:
- 3 ½ кг малини
- 600 мл вода
- 3 лимони, исечени на парчиња
- 600 г кафеав шеќер (може мед или друг засладувач по желба)
Подготовка:
- Најпрво измијте ги малините и исцедете ги од водата.
- Малините ставете ги во длабок сад и испасирајте ги со виљушка.
- Во садот со пасираните малини додајте 600 мл вода и измешајте со поголема лажица.
- Потоа во садот додајте ги кафеавиот шеќер и сечканите лимони.
- Добро измешајте ја целата смеса.Оставете ja да отстои најмалку 12 часа во покриен сад во фрижидер.
- После тоа, сокот процедете го низ газа или многу ситно цедило, настојувајќи да го искористите целиот сок.
- Процедениот сок ставете го во стерилизирани стаклени шишиња. Шишињата добро затворете ги.
- Шишињата сок чувајте ги на темно и ладно место. Послужете го со коцки мраз, парчиња лимон и свежо нане. На здравје!
Ви предлагаме да прочитате: Џем од малини на француски начин.