Здрави, вкусни, хранливи и симпатични, ете баш така би ги опишале овиe чоколадни колачиња од суво овошје и јатки. Толку се слатки и декоративни, што сме сигурни дека штом еднаш ги подготвите и се уверите во нивниот вкус, ќе ги правите секогаш повторно и повторно. Овој рецепт ни доаѓа од кујната на Лана, а тоа е еден доказ плус за совршеноста на овој рецепт.
Доколку сакате да добиете здрави чоколадни колачиња направете ги црно чоколадо, но може да употребите и млечно или бело чоколадо, ако сакате да имате повеќе видови. Исто така може да користите секаков вид на суво, кандирано и зашеќерено овошје и јатки по ваша желба. Едноставно препуштете и сѐ на фантазијата и креирајте чоколадно уживање по ваш вкус.
Состојки:
- 200 г црно, млечно или бело чоколадо по желба
- суво или кандирано овошје по желба (суви смокви, урми, кајсии, брусница, суво грозје, кандирана кора од портокал, кокос)
- јатки по желба (бадеми, лешници, ореви, индиски ореви, кикиритки или фстаци).
Подготовка:
- Најпрво растопете го чоколадото на пареа.
- Потоа, од растопеното чоколадо ставете по 1 – 2 лажици во секој отвор на мини силиконските калапи за мафини. Доколку немате вакви калапи, тогаш може да нацртате кругови на хартија за печење, да ги исечете и врз нив да нанесете од растопеното чоколадо.
- Пред да се стврдне чоколадото, врз секое колаче ставете по 1 лешник, бадем, орев и сечкано суво или кандирано овошје по желба.
- Откако ќе се стврдне чоколадото, колачињата многу лесно ќе ги извадите од калапите или одлепите од хартијата за печење.
- Вака подготвените колачиња совршено одговараат со ликер од чоколадо. На здравје!
Ви препорачуваме да прочитате: Полнети урми со кремаст фил и јатки.