Обожаваме брзи и лесни рецепти, особено за појадок. Дали тоа ќе биде некој намаз, јајца, смуди, житарици или домашно лепче, важно е да биде хранливо и здраво. А благодарение на Катерина, споделуваме лесен рецепт за подготовка на јајца во доматен сос со моцарела.
Сигурно знаете дека појадокот треба да биде главен оброк во текот на денот и да изобилува со хранливи состојки за да ви даде енергија за преку целиот ден. А токму ваков оброк може да направите доколку го приготвите овој рецепт.
Состојки:
- 4 јајца
- 2 главици кромид
- 4 чешниња лук
- 400 гр лупени домати во сопствен сос (пелати)
- 1 мала лажичка оригано
- 250 гр моцарела (во замена може да се користи кашкавал)
- по потреба масло, сол, мелен црн пипер.
Подготовка:
- Исечете го кромидот на тенки листови и ставете го во нелеплива тава на оган да се пржи.
- Доматите испасирајте ги со виљушка.
- Откако кромидот малку ќе омекне додајте ги пасираните домати, ситно сечканиот лук и ориганото.
- Посолете и зачинете со мелен црн пипер. Оставете доматите да се динстаат на среден оган за време 10-15 минути.
- Во тавата со домати и кромид направете 4 вдлабнатини и во нив ставете ги јајцата.
- Тавата поклопете ја со капак и намалете ја температурата. Оставете го капакот врз тавата додека јајцата се запечат.
- Сосема на крај додајте ја моцарелата исечена на коцки.
- Покријте повторно со капак и оставете на оган додека се растопи моцарелата. Готовите јајца во доматен сос со моцарела послужете ги додека се топли. На здравје!
Рецептот го испратил: Катерина Милошевска Глигороска.
Ви предлагаме да прочитате: Пржени јајца со пиперки и маслинки.