Посни меки бобици

„Овој стар рецепт од вештите раце на мајка ми е врв во мојата кујна. Секогаш кога сакам нешто да замесам, а да не ми одзема време со радост ги правам овие лепчиња меки како душа. Лесна изработка, а крајниот ефект уште повеќе произведува радост. Да напоменам уште и дека се посни.“ – вели Билјана за нејзините посни меки бобици.

Ја обожававме брзата и лесна подготовка на печива. Барајќи на интернет, наидовме на рецепт за бобици на блогот на Билјана. Ѝ благодариме за можноста да споделиме нејзин рецепт на нашата веб страна.

посни меки бобици 2

Состојки:

  • 700 г брашно
  • 1 квасец
  • 4 лажици шеќер
  • 1 лажица сол
  • 5 лажици масло
  • 300 мл топла вода.

Подготовка:

  1. Во сад за месење ставете ги квасецот со малку млака вода, 2-3 лажици брашно и 1 лажиче шеќер. Измешајте за да се растопи квасецот. Оставете го 5-10 минути за да нарасне.
  2. Во садот додајте ги преостанатите состојки и замесете средно меко тесто. Тестото оставете го 30 минути да нарасне.
  3. Потоа пак премесете го и поделете го на 16 еднакви делови. Од секој дел формирајте топче.
  4. Топчињата наредете ги во плех претходно обложен со хартија за печење. Оставете ги уште малку да нараснат.
  5. Во меѓувреме, додека топчињата да нараснат, загрејте ја рерната на 200 степени. Лепчињата печете ги во загреаната рерна 15-тина минути додека поруменат. Печените посни меки бобици извадете ги од рерната и покријте ги со кујнска крпа за време од 5 минути. Потоа послужете ги топли или ладни. На здравје!

Автор на рецептот: Билјана Гушевска, @biljanoteka.

Ви препорачуваме да прочитате: Домашни лепчиња со маслинки.

Следете ја sezahrana.mk и на Instagram и Pinterest.

Сподели: