Kрцкави печени шницли од рерна • Сè за храна

Штом се спомнат шницли, во устата се јавуваат сочни сензации и се створува апетит и желба да се вкуси тоа одлично јадење! И ние ги обожаваме, а како полесна, побрза и непржена варијанта, ви предлагаме да пробате крцкави печени шницли од рерна!

Одлични за дома и за гости, послужете ако сакате и друг прилог по желба и уживајте во јадењето!

Состојки:

600 г свинска удина од Агриа
2-3 матени јајца
50 г лебни трошки
30 г рендан пармезан
1/2 лажиче црн пипер
1 лажиче ситна црвена пипер
сол по вкус
3-4 лажици масло.

За прилог и декорација:

варени компири
магдонос
кришки лимон.

Подготовка:

Свинската удина исечете ја на шницли со дебелина до 1 см, а потоа убаво истенчете ја со помош на кујнски чекан до дебелина од 5-6 мм.
Тавата за печење премачкајте ја со масло или обложете ја со хартија за печење.
Во помал сад ставете ги лебните трошки, пармезанот и зачините. Измешајте.
Шницлите потопете ги во добро изматените јајца, па секоја од нив извалајте ја во садот со лебните трошки од двете страни и ставете ја во тавата за печење.
Откако сите ги припремите вака, одозгора налејте по малку масло врз секоја шницла.
Печете во претходно загреана рерна на 220 степени 5 до 6 минути, па свртете ги шницлите од другата страна и повторно печете 5-6 минути, потоа намалете ја температурата на 200 степени и печете уште 25 -30 минути. Ако имате било каков сомнеж дали се добро печени, пресечете една и погледнете во средината.
Печените свински шницли сервирајте ги со варени компири и декорирајте ги со магдонос и тенко исечкани кругови лимон. Најубави се топли, на здравје!

Совети плус:

Наместо пармезан може да искористите и биено сирење. Компирите за прилог наместо варени, може да се печени или пржени.
Шницлите ќе бидат највкусни ако ги припремате од свежо месо. Изберете свежо свинско или телешко месо од Агриа. Ние долги години сме задоволни корисници, па затоа и ги препорачуваме. Свежото свинско месо и телешко месо од Агриа може да го најдете во нивните месарници (Битола, Велес и Штип), а свинското месо е достапно и во Тинекс и Рамстор маркетите. За сите новости посетете ја веб страницата на Агриа и следете ги на нивната фан страница на Facebook.
Ако месото ви е купено од претходно и сте го замрзнале, најдобро е да го оставите скоро целосно, но не потполно да се одмрзне, за најлесно да ги исечете шницлите.