Кој е за супер вкусен и здрав оброк? – Ако и вие обожавате палачинки, ова е вистинскиот рецепт за вас! Овесните палачинки со спанаќ се едни од најомилените во нашиот тим. Често ги приготвуваме во кујната на sezahrana.mk, а во оваа прилика го споделуваме рецептот со вас.
Богати се со хранливи материи, здрави се, вкусни и лесни за јадење. Се прават многу брзо, а се јадат уште побрзо. Ќе ги обожава цело семејство, а и цело друштво. За сите што сакаат да се хранат здраво, а постојано се во трчање, имаме добра вест! Вкусните палачинки со спанаќ се готови 10 – 15 минути, а може и да ги спакувате за на работа, на училиште, на факултет или пикник.
Состојки:
- 3 јајца
- 1 чаша јогурт
- 1 1/2 чаша овесни снегулки
- прстофат хималајска сол
- 1 лажиче прашок за печиво
- 1/2 чаша спанаќ
- малку вода
- маслиново масло.
Подготовка:
- Во блендер ставете ги сите состојки.
- Блендирајте додека да добиете изедначена и средно густа смеса.
- Ако смесата е многу густа, може да додадете уште малку вода.
- Тавчето намачкајте го со малку маслиново масло и загрејте го на средна температура.
- Со супена лажица земете од смесата и ставете во тавчето. Најчесто во тавчето собира 2 до 3 палачинки.
- Секоја палачинка печете ја околу 2 минути, или додека да се појават меурчиња.
- Постапката повторете ја со целата смеса.
- Може да ги комбинирате во блага или солена верзија, да декорирате со орев, мед, овошје, крем сирење, домат или зелена салата.
Совет плус: Доколку сакате поголеми палачинки, може да користите поголема рамна лажица.
Ви препорачуваме да прочитате: Здрави мини палачинки со капинки.