Кога сакате да подготвите поинаков леб со посебен вкус, треба да се навратите на овој рецепт! Сите правиме различни лепчиња дома, а секое залче од нашиот домашен леб со пршута и фстаци буди желба да посакате да каснете уште!
Невена е одлична во кујната, а ние уживаме да ги дегустираме нејзините јадења. Погледнете како да си го направите и вие дома.
Состојки:
- 125 мл топла вода
- 125 мл топло млеко
- 5 лажици масло
- 100 гр пршута
- 40 гр сечкани фстаци
- 40 гр рендан кромид
- 2 лажици пармезан
- 2 лажици сечкан магдонос
- 20 гр квасец
- 1 лажиче шеќер
- 1/2 лажиче сол
- 500-520 гр брашно.
Подготовка:
- Пршутата, фстаците и кромидот исечете ги на ситни парченца. Магдоносот исто така исечкајте го ситно.
- Потоа, во сад за месење ставете ги сите состојки и убаво измешајте ги. Најдобро прво да ги додадете сите суви состојки, а потоа течните.
- Со раце замесете тесто и оставете го да стои околу 45 минути за да нарасне.
- Размесете го тестото и направете го со тркалезна форма.
- Изберете тава или плех за печење и обложете со хартија за печење.
- Во тавата ставете го тркалезно оформеното лепче и оставете го да стаса 40 минути. По желба може да го засечите малку по површината со остар нож.
- Ставете го да се печи во загреана рерна околу 45 минути, на температура од 180 степени.
Рецептот го испратил: Невена Ѓероска.
Ви препорачуваме да прочитате: Леб со маслинки, ореви и сушени домати.