Зимата е период кога имаме помал избор на зеленчуци, а истите најчесто имаат многу повисоки цени. Но, нутриционистите секогаш советуваат да се јаде сезонски зеленчук, кој е свеж и има релативно пристапна цена. Така направивме комбинација на неколку лесно достапни зеленчуци кои ги има во зимскиот период и ја креиравме оваа вкусна витаминска салата.
Изобилува со растителни влакна, витамини и минерали кои му се многу потребни на организмот во ладните денови. Трупката и зелката се нискокалорични, содржат висок процент на растителни влакна, а се препорачуваат за забрзување на метаболизмот, намалување на вишокот на килограми и за превенција на канцер.
Морковите изобилува со хранливи состојки и се препорачуваат во диеталната исхрана и во исхраната кај децата. Овој коренест зеленчук е богат со бета каротен, а освен за видот, одличен е за детоксикација и намалување на телесната тежина, затоа што содржи големи количини на растителни влакна и витамин А.
Семето од чија е се повеќе е популарно во третманите за намалување на телесната тежина, затоа што ја намалува апсорпцијата на храната, како резултат на зголемувањето на нејзиниот волумен и олеснувањето на процесот на варење на храната со што овозможува нејзино побрзо поминување низ дигестивниот систем, подобро и полесно празнење на цревата.
Состојки:
- 1 трупка со средна големина
- 2 моркови
- 4 до 5 листови кинеска зелка
- 1 чаша ситно сечкана зелка
- 1 мала лажичка чија семе
- хималајска сол по вкус
- ладно цедено маслиново или сончогледово масло
- јаболкова киселина.
Подготовка:
- Трупката и морковите се лупат и рендаат на поголемата страна од рендето.
- Кинеската зелка се ситно се сечка.
- Во длабок сад се ставаат ренданите моркови, трупката, кинеската зелка и сечканата зелка. Се мешаат и се зачинуваат со хималајска сол, маслиново масло и јаболкова киселина.
- Готовата зимска витаминска салата се служи во чинии и се посипува со чија семе. На здравје!
Ви предлагаме да прочитате: Свежа салата за брз метаболизам и добар имунитет.