Лето, море и Италија! Убава земја со богата историја и уште повкусна кујна. Инспирирани од една од најубавите италијански салати ви припремиве капрезе сендвич со нане. Доволни ви се само 10-тина минути за да уживате во медитеранската арома на босилек, домати и моцарела.
Времето е топло, а брзите рецепти се секогаш прв избор. Затоа, не губете многу време во кујната и уживајте во прошетките во природа.
Состојки:
- 1 француски багет
- 150 грама свежа моцарела
- 2 лажици песто сос
- 2 домати
- свежо нане
- путер по потреба.
Подготовка:
- Багетот пресечете го на половина. Секој дел пресечете го на средината.
- Доматите и моцарелата исечете ги на тенки кругови.
- Внатрешната страна на багетот премачкајте ја со малку путер.
- Багетот ставете го на тостер кратко да се запече.
- Печените лепчиња премачкајте ги со песто сос и врз нив наредете сечкана моцарела, а притоа не ги затворајте. Така подготвените сендвичи наредете ги во тава.
- Тавата со багетите ставете ја во загреана рерна на 200 степени. Печете ги околу 3-5 минути за да се растопи моцарелата.
- Потоа извадете ги лепчињата и врз растопената моцарела ставете ги сечакните домати. По желба во готовиот капрезе сендвич додајте свежо нане или босилек. Уживајте во фантастичниот вкус и италијанската кујна со „Сѐ за храна“!
Овој рецепт го припреми нашата уредничка Марија Кочовска за списанието Добра храна.
Ви препорачуваме да прочитате: Капрезе салата со рукола, маслинки и песто.