Дали сте пробале карамелизиран кромид? Во последно време е мошне популарен и во светските кујни. Му дава посебна арома на секое јадење и има неограничени можности за негова употреба. Денес ќе ви откриеме како може да го направите и самите дома!
Карамелизираниот кромид има многу пријатен вкус и совршено се надополнува со останатите јадења, без разлика дали се служи како додаток на главното јадење или аперитив. Еднаш кога ќе го пробате и ќе го почувствувате неговиот специфичен вкус, ќе имате јасна претстава како да го вклопите во речиси секој оброк. Совршено се совпаѓа со хамбургер, со месо, па дури и со сирење. А, кога еднаш ќе го подготвите може да го складирате во чиста стаклена тегла и да го чувате во фрижидер и до неколку дена.
Состојки:
- 1 кг кромид
- 100 г шеќер
- малку киселина
- прстофат сол
- 2-3 лажици маслиново масло.
Подготовка:
- Најпрво исчистете го кромидот и исечкајте го.
- Во длабок сад, на загреано маслиново масло ставете го кромидот да се динстува.
- Зачинете го со сол по вкус и додајте малку киселина. Може да користите било кој вид на киселина.
- Кромидот динстувајте го на пониска температура околу 1 час со повремено мешање или се омекне и добие стаклест изглед. Во меѓувреме садот со кромид треба да биде поклопен.
- Потоа, додајте го шеќерот и покачете ја температурата на шпоретот со цел да се карамелизира шеќерот. Откако ќе го додадете шеќерот постојано мешајте, бидејќи во спротивно кромидот може да загори.
- Вака карамелизираниот кромид складирајте го во чиста тегла и користете го по потреба.
Напомена: Со 1 килограм кромид се полни околу 1 тегла од ½ килограм. Количината на кромид се намалува со процесот на динстување, бидејќи содржи голема количина на вода која со додавањето на сол забрзано се ослободува. Во замена за киселина може да додадете ½ чаша вино. Исто така, наместо бел, може да користите кафеав шеќер.
Ви препорачуваме да прочитате: 3 начини за сечење кромид без да ви солзат очите.