Ние сме љубители на нови нешта во кујната и на трпезата. Токму тоа беше и причината за овие пилешки ќебапи со рукола да бидат избрани за да ги споделиме на Сѐ за храна! Впечатливо изгледаат, а за вкусот нема што да ви кажуваме, мора да се почувствува!
Еве што ни рече Невена за нив: „Вкусни и интересни по состав ќебапчиња, а и уште еден начин да се искористи руколата.“ Ние и веруваме на зборот, а се уверивме и од нејзината убава фотографија.
Состојки:
- 550 гр мелено пилешко бело месо
- 70 гр рукола
- 1 мало јајце
- 4-5 лажици лебни трошки
- 1/2 мала главица (40 гр) рендан кромид
- 1 мало чешне ситно сечкан лук
- 1 лажиче мешан сув зачин
- по вкус сол и бибер
- по потреба масло за пржење на ќебапите.
Подготовка:
- Месото ставете го во поголем чист сад.
- Руколата исечкајте ја многу ситно и додајте ја во месото.
- Додајте ги останатите состојки и убаво измесете ги со рака. Смесата треба да биде доволно цврста за да можат да се обликуваат ќебапчињата, па затоа ако е потребно додајте уште лебни трошки.
- Смесата ставете ја да стои во фрижидер околу 2 часа за малку да се стегне, а потоа направете ги ќебапчињата.
- Пржете ги во загреано масло на умерен оган, додека добијат црвенкаста боја.
- Послужете ги топли со прилог и салата по желба. На здравје!
Рецептот го испратил: Невена Ѓероска.
Ви препорачуваме да прочитате: Како да направите дома сочни ќебапи?