Некој можеби пробал, а некој не, како и да е оваа салата е многу вкусна, освежителна и хранителна. Некој и дал свое име, а ние ја нарековме редена мимоза салата. Повикајте друштво и обавезно пробајте ја!
Оваа доза е доволна за 2 лица. Доколку сакате поголема количина слободно земете двојна доза од состојките. Ви препорачуваме за време на припремањето на салатата, за секоја од состојките да користите одделни садови и на крај да ги сервирате во чинијата во која ќе ја послужите. Еве на кој начин ја подготвивме ние.
Состојки:
- неколку листови свежа салата (салатка, марулка)
- 3 варени јајца (2 рендани и 1 за декорација)
- 200 мл павлака
- 1 поголем варен компир или 2 помали компири
- 150 гр рендано биено сирење (по желба може и со бело)
- 50 мл мајонез.
Подготовка:
- Убаво измијте ги листовите свежа салата и оставете ги малку да се исцедат од заостанатата вода, а потоа врз кујнска даска исечете ги рамномерно на парчиња со ширина од 1 см.
- Јајцата најпрво сварете ги, а потоа две од нив изрендајте. Едно од јајцата оставете го цело и пред сервирање сечете го на четири парчиња по должина.
- Компирот излупете го, сварете го и на крај изрендајте го.
- Сирењето изрендајте го и околу 100-тина грама оставете го за сервирање, а останатите 50 грама ставете ги во посебен сад.
- Во садот во кој сте го издвоиле ренданото сирење, додајте го и ренданиот варен компир, ренданите јајца, мајонезот и павлаката (од неа издвојте една топка за декорација), па убаво измешајте ги состојките за да се соединат.
- Во голема плитка чинија, започнете со сервирање на редената мимоза салата. Во средината ставете ја крем салатата, а од горе декорирајте ја со топката павлака која претходно сте ја издвоиле. Исечената зелена салата ставете ја од двете страни на чинијата, а помеѓу неа ставете ги ренданите јајца и ренданото сирење.
Ние практикуваме што поздрави избори на храна, па при подготовката не употребивме сол, а вие по желба може да додадете согласно со вашиот вкус. Уживајте во декоративната и многу вкусна мимоза салата, а овој пат редена и подготвена на наш начин. На здравје!